Башкалабыз Казанның «Пирамида» мәдәни-күңел ачу комплексында татар эстрадасының популяр артистлары катнашында «Үз эшләребез белән Ватанны данлыйбыз!» дип исемләнгән зур хәйрия концерты булып узды.
Оештыручылар концерттан кергән акчаны мобилизацияләнгәннәрнең гаиләләренә һәм махсус хәрби операциядә катнашучыларга гуманитар ярдәмгә юнәлдерә. Хәйрия концертында күренекле җырчылар, Казан мәдәният институты иҗат коллективлары, «Юл хәрәкәте иминлеге» фондының «Безнең заман» фестивале Гран-при ияләре дә чыгыш ясады.
Мондый масштаблы бәйрәмгә әзерлек өч ай чамасы дәвам итте. Җаваплылык та зур — әлеге концерт — хәйрия концерты, җыелган барлык акчалар махсус операция зонасында булган хәрбиләргә ярдәмгә китә.
Әлеге матур, күңелле һәм якты бәйрәм өчен, залда утырган һәрбер кеше үзенең ихлас алкышларын җәлләмәде. Вакытлы ялга кайткан хәрбиләрдән, аларның әниләреннән, Казан мәдәният институты ветераннарыннан да рәхмәт сүзләре яңгырады.
Чулпан Әмири, Вадим Сунцов, Владимир Юрков, Татарстан яңалыклары.
