Хәерле көн, мөхтәрәм телевизор караучылар! Гадәттәгечә, татар матбугатындагы игътибарга лаек язмаларны күзәтүне дәвам итәбез.
”Мәчеттә- сәхнә, ә сәхнәдә- дискәтүк?” дип аталган язмада “Шәхри Казан” газетасы журналисты Сарман районының Яхшыбай авылындагы 116 еллык мәчетнең бүген дә манарасыз, клуб булып хезмәт итүе турында әрнеп язган. Безнең күбебезне Совет хөкүмәте манарасы киселгән мәчет биналарындагы мәктәпләрдә укытып, клубларында күңел ачарга өйрәтте. Имансызлык норма саналган илдә бу гамәлләрдән яманраклары да җитәрлек булды. Ләкин дөньяга күзе ачылган яшь буын вәкилләренең тырышлыгы белән ул хаталарның күпчелеге бүген төзәтелә башлады, шөкер. Иншаллах, Сарман районындагы бу мәчетне төзеткән иманлы сәдәгәр Мортаза Мусинның да дәвамчылары табылыр, иман йортына манара куелыр дип ышанырга кирәк.
Газетадагы тагын бер күңелгә тия торган гыйбрәтле язма ике ятим баланы алып аякка бастырган Янковскийлар гаиләсе турында. Табиблар беркайчан да балагыз булмый дигән диагноз куйгач, Болгарда яшәүче ирле-хатынлы Янковскийлар, ятимнәр йортыннан ике авыру бала алып, шуларны күпсанлы операцияләр ясата-ясата аякка бастырганнан соң, могҗиза була- бер-бер артлы үзләренең ике баласы дөньяга килә. Бүген бу гаилә үзләре кебек ятимнәрне тәрбиягә алучылар өчен ярдәм итү үзәге булдырганнар. Ничек кенә зарлансак та, дөньяда яхшы кешеләр hәм яхшы гамәлләр барыбер күбрәк.
“Ватаным Татарстан” газетасы Мәскәү белән Казан арасын ике мәртәбә диярлек якынайтучы яңа юл турындагы язманы беренче битенә чыгарып биргән. 810 чакрым тәшкил иткән юлны өч ел дигәндә салып чыгу, чыннан да, зур казаныш. Өч чакрымнан артыграк озынлыктагы Идел аша салынган күпер үзе генә ни тора. Ләкин шушы галәмәт зур эшләр янәшәсендә гап-гади газета-журналларның укучыларга 5-6 көн баруын берничек тә аңлап та, аңлатып та булмый. Газета журналистының авылларда элемтә бүлекчәләренең ни сәбәпле ябылуы турында белешкән язмасында бары тик безнең илдә генә булырга мөмкин хәлләр тасвирлана. Эшләр болай барса, матбугатны яздырып алучылар да юкка чыгарга мөмкин дип уйлап куясың ул язманы укыганда.
“Казан утлары” журналының ноябрь саны Чаллыда яшәүче талантлы шагыйрә Лилия Гыйбадуллинаның “Татар нефте” дигән шигырьләр циклы белән башланып китә.
Кара алтын булып татар җаны\\Татар рухы ага, аңласаң\\Үзен, сүзен, телен данла аның\\Җырын данла,малын данласаң, дип кисәтә аңлаганнарны шагыйрә. Журналны даими укучыларга редакция бүләк әзерләгән- Равилә Шәйдуллина-Муратның яңа гына табадан төшкән “Тау башында бүре бар” романын бастыра башлаган. Язучының “Карт шомырт хатирәсе” романын яратып укыганнарга бу романның да күңелләренә хуш киләсенә шик юк.
Укудан тәм табып, фикер офыкларыбызны киңәйтеп яшәргә язса иде дигән теләктә бүгенгә сезнең белән саубуллашам. Исәнлектә күрешик!
