Казанда Мәҗит Гафури исемендәге Башкорт дәүләт драма театры Камал театры сәхнәсендә Казан гастрольләрен башлады. Башкорт дуслар башкаладагы гастрольләрен Камал театры сәхнәсендә татар язучысы Зифа Кадыйрованың «Синсез килгән язлар» әсәре буенча куелган мелодрама белән башлап җибәрде. Башкорт артистлары белән Ләлә Зәйнуллина күрешеп кайтты.
Башкортостан драма театрының Казанда беренче гастрольләре 1972 елда булган. Шунан алып, ике елга бер тапкыр алар Татарстан тамашачыларын үз спектакльләре белән сөендереп килә. Быелгы гастрольне Уфадан Башкортстанның мәдәният министры урынбасары Ренат Гайсин һәм Татарстанның мәдәният министры урынбасары Ленар Хәкимҗанов ачты.
Башкорт дуслар исә, үзләре Казанда тамашалар күрсәтүне имтиханга тиңләштерә.
Гастролҗне ачу тантанасында тәкъдим ителгән «Синсез килгән язлар» спектакле язмыш тарафыннан бирелгән бер төрле сынауны ике хатын-кызның төрлечә үтүен бәян итә. Фирая иренең хыянәте турында аның үлеменнән соң гына белә. Ә Алсу Фәрхәдне кичерә һәм күңелендә аңа булган нәфрәттән арына.
Хатын-кыз сабырлыгы, сынауларга дучар ителгән яралы язмышлар шатлыгын да газабын да үзенә сыендырган мәхәббәт. Зифа Кадыйрова әсәрендә әнә шул тема чагыла. Нәкъ менә шул тормышта очрый торган вакыйгалар укучы күңеленә үтеп керә. Спектакльне карарга автор Зифа Кадыйрова үзе дә килгән иде.“Синсез килгән язлар» спектаклен тамашачы бик җылы кабул итте.
Башкортостан драма театры гастрольләре 19 нчы ноябрьгә кадәр дәвам итә.
Ләлә Зәйнуллина, Альберт Сафиуллин. Татарстан яңалыклары.
