Республикабызның Саба районында Татарстанның атказанган төзүчесе Фәргать Әһлиулла улы Нәбиуллин истәлегенә ачык көрәш турниры узды. Ярышта Саба , Теләче , Балтач, Мамадыш , Биектау районнарыннан 130 дан артык көрәшче бил сынашты.
Саба районы төзелеш тармагы үсешенә зур өлеш керткән , күп биналар салдырган , ремонт –төзекләндерү эшләрен башкарган , шул ук вакытта татар көрәшен үстерүгә күп көчен биргән шәхесләребезнең берсе — Фәргать Нәбиуллин. Аның истәлегенә икенче мәртәбә уздырылучы ачык турнирда катнашу өчен 130 дан артык яшүсмер катнашты.
Көрәш ул – малайларны кечкенәдән үзенә җәлеп итә торган спорт төре. Ярышка килүчеләрнең күбесе бик кечкенәдән көрәшәм инде, диләр горурланып. Теләче районы Олы Мәтәскә авылыннан Инсаф Ибәтуллин да шундыйлардан, бөтен ярышларда да катнашырга вакыт җиткереп булмый, ләкин укуда да, көрәштә дә сынатмаска тырыша.
Турнирның ачылышында Саба районы башлыгы Рәис Миннеханов катнашты. Фәргать Әһлиулла улы турындагы истәлекләрне яңартты.
Фәргать Әһлиулла улын ихтирам итеп элек бергә эшләгән хезмәттәшләре, дуслары килгән иде. Фәргать Нәбиуллинның тормыш иптәше Люция ханым, уллары Илназ, Илнар әтиләре истәлегенә турнир оештырырга ярдәм итүчеләргә, әтиләрен хөрмәт итеп килүчеләргә рәхмәт сүзләре җиткерделәр.
Фәргать Нәбиуллинның татарча көрәшкә битараф булмавына аптырыйсы юк. Ул үзе дә көрәшчеләре белән дан тоткан Югары Шытсу авылында туып-үсә. Спорт ярышлары календарендә әлеге турнирның дәвамлы булуына ышаныч зур.
Барысы да җиңүгә омтылып, матур көрәш күрсәтергә тырыштылар. Көрәштә җиңгән яшүсмерләр тормышта да һәрвакыт җиңүчеләр сафында булырга омтыла. Татарстан Республикасының атказанган тозучесе Фәргать Әһлиулла улы Нәбиуллин истәлегенә үткәрелгән татарча көрәш буенча турнир да эле күп яшүсмерләр өчен зур җиңүләргә юл башы булыр.
