Кыр эшләре тәмамланды гына кебек, әмма “Авангард” агрофирмасының Кайбыч бүлекчәсендә техника ремонты паркында төзекләндерү эшләренең беренче йомгаклары бар. Биредә техниканы кышкы саклауга кую 99 процентка башкарылган. Кыр эшләреннән бушаган механизаторлар ремонтка җәлеп ителгән. Киләсе сезонга техник әзерлек барышын хәбәрчебез дә күзәтте.
Техника ремонты паркында кара көзгә хас шау-шу. Зур ангарда тракторлар, тагылма җиһазлар, төрле детальләр. Ремонтчылар кагалар, кыралар, турайталар, эретеп ябыштыралар. Эретеп ябыштыручы Руслан Зиятдинов агрофирмада унсигезенче елдан бирле хезмәт куя. Ул кырда, фермада да эшли. Хәзерге вакытта эретеп ябыштыручы ремонт эшендә иң кирәкле фигура. Барлык төр җиһазлар аның кулы аша үтә.
Агрофирмада хәзерге вакытта үзебезнең илдә җитештерелгән чәчкечләр тулысынча төзекләндереп беткән. Хәзерге вакытта тырмаларны рәткә китерәләр. Аннары тракторларга, тагылмаларга, “КамАз”ларга чират җитә. Комабайннар да ябык биналарга урнаштырыла. Ремонт барышы өчен запас частьләр белән үз вакытында тәэмин ителү дә мөһим, әлбәттә.
Сүз уңаеннан, ремонт эшендә кадрларга кытлык юк. Инженер состав тулысынча комплектланган, ремонтчы-механизаторлар да җитәрлек.
Рөстәм Әхмәдуллин, Илнур Кадыйров, Татарстан яңалыклары
