Саба районы авыл хуҗалыгы тармагын үстерүгә зур игътибар бирелә. Икшермә авылында август аенда “Мөхәммәтшин” крестьян-фермер хуҗалыгында яңа сыерлар торагы файдалануга тапшырылган иде. Безнең иҗат төркеме биредәге шартлар белән танышып, хуҗалык җитәкчесе белән аралашып кайтты. Тулырак, алдагы язмада.
Яңа бинага керүгә, биредә чисталык һәм тәртип күзгә ташлана. 2021 нче елда төзелгән 2 терлекләр торагы үзен аклагач, быелның май аенда яңаны сала башлыйлар. Әлеге төзелеш хуҗалыкка 46 миллион ярымга төшә. Металл каркасларын Биектаудагы “Җиһан” оешмасы эшләсә, калганын үз көчләре белән булдыралар. Субсидия алу бәхетенә дә ирешкәннәр.
“Мөхәммәтшин” крестьян-фермер хуҗалыгында сыерның сөте телендә дигән сүзләрне истә тотып, малларны тукландыруга зур игътибар бирелә. Шулай ук мал ризыгына витаминнар, минеральлар да өстәлә.
Биредә сыерларны көненә өч тапкыр савалар. hәр савымчы тәүлегенә 2 савуда катнаша. Көненә 24 мең литр сөт савыла. Шуның 22 меңе Казан сөт комбинатына тапшырыла. 1 тоннасы бозауларга китә.
Агымдагы елда савым артса да, акча кереме кимегән. Хуҗалык җитәкчесе моны узган ел сөткә бәяләрнең югары булуы белән аңлатты.
Фермада ел әйләнәсе эш күп, терлекләр игътибар һәм хәстәрлек таләп итә. Механизаторлар басудагы эшләр беткәч, бирегә күчкәннәр. Әлеге торакта иртәнге 4тән кичке 8гә кадәр абыйлы-энеле Шакировлар хезмәт куя.
Ләлә Зәйнуллина, Рөстәм Хәлилов, Татарстан яңалыклары, Саба районы.
