Тарихы ерак гасырларга тоташкан шахмат уены бүгенге компьютер, гаджетлар дөньясында да популярлыгын югалтмый. Әлеге уенның иң төп әһәмияте — кешенең интеллектуаль сәләтен үстерергә ярдәм итүдә. Түбән Кама районында да — зур вакыйга- балалар өчен шахмат һәм бокс клубы ачылды. Аның җитәкчесе — Татарстан һөнәрчелек палатасы әгъзасы, Раил Әсләмов әйтүенчә- балалар өчен мондый заманча, уңайлы, файдалы үзәк булдыру күптәнге хыялы иде . Тантаналы чарадан Түбән Камадагы хәбәрчебез Албина Вәлиева реопртажы.
Башны эшләтә торган уен башланды. Раил Әсләмов кечкенә шахматчы белән көч сынаша. Татарстан һөнәрчелек палатасы әгъзасы балалар өчен клуб булдыру теләге белән күптәннән янып йөри – бүген, ниһаять, хыялы чынга ашты.
Мондый композиция Түбән Камада гына түгел, бөтен Татарстанда да юк. Өстәлләр, урындыклар, шахмат фигуралары – барысы да кулдан ясалган. Аның авторы — Фернат Хәлилулин. Казан остасы белдерүенчә, Раил Әсләмовның идеясен тормышка ашыру өчен дүрт ай вакыт китә.
Клуб Кайманов урамындагы 9 адресы буенча урнашкан. Анда 21 нче микрорайонда яшәүче балалар йөриячәк. Аларны шахмат уйнарга Альбина Шәвәлиева өйрәтә. Тренерның эш стажы – 23 ел. Аның сөйләвенчә, шахмат клубына 6 малай һәм 6 кыз йөри. Дәресләр атнага өч тапкыр – сәгать ярым дәвамында бара. Барысы да – түләүсез.
Бокс буенча дәресләрне Рамил Ибраһимов алып барачак. Аның да эш тәҗрибәсе зур. Хәзер балаларны яздыру бара. Яшь категориясе – 7 яшьтән тугызга кадәр.
Бәйрәмне җирле артистлар чыгышы бизәде. Махсус кунак — Резедә Шәрәфиева. Татарстанның халык артисты килгән кунакларны танылган җырлары белән сөендерде.
Клуб җитәкчесе Раил Әсләмовның планнары зурдан. Киләчәктә балалар өчен куркынычсызлык буенча дәресләр оештырырга тели – моның өчен янгын сүндерүчеләр, экологлар, урман хуҗалыгы хезмәткәрләре һәм ЮХИДИ инспекторларын чакырачак.
Альбина Вәлиева, Булат Әбделманов, Татарстан яңалыклары.
