Авыл хуҗалыгында бер эш икенчесенә бәйләнгән. Бөртеклеләрне җыю тәмамланып, хәзер шикәр чөгендере, көнбагыш, кукуруз суктыру эше бара. Көннәрнең яхшы торуыннан файдаланып, комбайнчылар да ел уңышын җыю өчен тырыша. “Восток” агрофирмасында көнбагыш җыю эшен без дә төшереп кйттык.
“Восток” агрофирмасының “Сармаш” бүлекчәсе кырында моңа кадәр кояштай янып торган сары көнбагышлар өлгереп башын игән. 180 гектар мәйдан биләүче басуда 6 комбайн уңышны җыеп алуда катнаша. Һәр гектардан уртача 15 центнер уңыш чыга. Агрофирмада бу культура 503 гектар мәйданда утыртылган.
Басуда эш иртәдән үк башлана. Механизатор Айрат Җиһаншин 16 елдан артык комбайн штурвалы артында. Моңа кадәр икмәк уңышын җыюда катнашкан алдынгы игенчеләрнең берсе. Хәзер ул Акрос комбайнында көнбагыш суктыра.
Көнбагыш бөртекләрен ташу өчен техника да берсен-берсе алыштырып кына тора. Прицеп тагылган КамАЗ машиналары суктырылган уңышны Зәй элеваторына илтә.
Зәй басуларында көнбагыш 3165 гектар мәйданда үстерелде. Хәзерге көндә барлык мәйданның 26 проценты суктырылган. Бу эшне 7 комбайн – “Зәй шикәре” һәм “Восток” агрофирмалары эшчеләре башкара
