Көзнең икенче аена да аяк бастык, бу атнада Казан шәһәрендә һәм төбәк районнарда нинди спектакльләр уйнала, нинди чаралар көтелә.Әйдәгез, бергәләп барлыйк.
4 нче октябрь көнне Галиәсгар Камал исемендәге Татар дәүләт академия театрына “Гөргөри кияүләре » спектакленә чакырабыз. Гөргөри абзый һәм Кәтернә түтинең төпчек кызлары Үринәне берьюлы өч егет яратып йөри. Олы кызлары икесе дә атасыз бала үстерә. Шуңа күрә Гөргөри абзый Үринәне керәшен татарлары йолалары буенча гына кияүгә бирергә карар кыла. Дәвамын спектакльне карап белерсез.
Кәрим Тинчурин исемендәге Татар дәүләт драма һәм комедия театры Татарстан Республикасында беренче тапкыр, балалар һәм яшүсмерләр өчен, «Татар теле – сәхнә теле» дип аталган кызыклы һәм үзенчәлекле спектакль-дәрес тәкъдим итә. Спектакльга билетны “Пушкин картасы” ярдәмендә сатып алырга мөмкин. 5 нче октябрь көнне Кәрим Тинчурин театрында чын тормышны тасфирлаган «Гомер буе сине көтәм» спектакле . Гади китапханәче белән гади урманчы арасындагы саф, сагышлы мәхәббәт тарихы тамашачыны уйланырга, елмаерга мәҗбүр итә.
Аяз Гыйләҗев исемендәге Чаллы татар дәүләт драма театрында “Диләфрүзгә дүрт кияү ” спектакле. Авылның дүрт егете дә гүзәл Диләфрүзнең йөрәген яуларга җыена, ә менә кыз үзе аларның кайсын сайлар?..Комедия Туфан Миңнуллинга хас нечкә юмор белән сугарылган, күңелле, дәртле җырлар белән үрелеп бара, мәхәббәт сере турында сөйли.
Иделнең ике як ярында урнашкан ике колхоз һәрдаим көндәшлектә. Беренче колхозны Вильдан җитәкли. Аның колхозында алдынгы сыер савучы Зәйтүнә эшли. Каршы як ярдагы колхоз өчен Зиннәт җавап тота. Зәйтүнә һәм Зиннәт арасында барлыкка килгән хис-тойгылар Вильданга тынычлык бирми. Спектакль нинди борылыш алыр? Бу турыда спектаклне карап белерсез.
Яңа концерт сезонында Салих Сәйдәшев исемендәге Дәүләт Зур концертлар залы тыңлаучылар игътибарына 20 нче гасырның бөек татар композиторларының иҗатына багышланган ”Бөек шәхесләр” дип исемләнгән концерт тәкъдим итәбез. 8 нче октябрь конне узасы концертта Рөстәм Яхинның репертуарыннан алынган көйләр яңгыраячак.
Милли музейда “Мы – русские” дип исемләнгән күргәзмәгә ачылда . Биредә 19 нчы гасырның беренче яртысында тәкъдим ителгән экспонатлар һәм этнографик фотографияләр рус мәдәниятенең байлыгын һәм үзенчәлеген чагылдыра. Күргәзмә кысаларында рус халкының милли костюмына һәм гореф-гадәтләренә багышланган тематик лекцияләр узачак. Күргәзмә 11 октябргә кадәр эшли.
5 нче октябр көнне – көзнең иң матур бәйрәмнәренең берсе – укытучылар көне! Шул уңайдан “Много школ- одна культура» дип исемләнгән фестивальның гала-концерты булачак. Чарада Казан консерваториясе, Яр Чаллы, Әлмәт музыка көллиятләре студентлары катнашуы көтелә.
