Район полиция хезмәткәрләре тоннель профилактик акциясе уздырды. Ул машина йөртүчеләр арасында хокук бозуларны ачыклау һәм юл транспорт һәлакәтләрен булдырмау максатыннан оештырылды.
Юхиди инспекторы камаз йөк машинасының руль системасын тикшерә. Әлеге техниканың төзеклегендә берникадәр кимчелекләр бар. Бу исә машина йөртүчегә штраф һәм техниканы вакытлыча тоткарлау яный дигән сүз. Айга бер тапкыр район юхиди бүлеге полиция хезмәткәрләре белән бергәлектә юлларыга чыгып тоннель профилактик чарасын уздыра. Аның барышында кагыйдә бозучыларны ачыклыйлар. Әлеге рейдта һәр машина инспекторларның үткен күзе аша уза.
Рейдта юл хәрәкәте куркынычсызлыгы идарәсенең авырлык контроле хезмәткәрләре дә катнашты. Йөк машиналарының авырлыгын үлчәп, кимчелекләрне ачыклады алар. 2023нче елда Актаныш районы юлларында хәмер кулланган килеш машина белән идарә итүчеләр катнашында 5 юл-транспорт һәлакәте теркәлгән. Киләчәктә мондый хәлләрне булдырмау максатыннан профилактик рейдлар алга таба да оештырыла.
Регина Сәләхова, Марат Саррахов, Татарстан яңалыклары, Актаныш районы.
