Гадәттә сәхнә арты серле бер дөнья булып кала, ләкин монда да чын тормыш кайный, биредә һәрбер кеше үз эше белән мәшгуль. Әйтик, кемдер спектакль өчен суыткыч әзерли.
Артистларның бизәнү һәм киенү бүлмәсенә керү бәхете дә елмайды, биредә ханымнар чын каләш образында, хәтта ак күлмәк тә киеп өлгергәннәр иде, тиз арада Алинә Мөдәрисова белән дә аралашып алдык.
Камал театры җомга көнне, тамашачыны яңа сезонның “ Ситса туй” спектакле белән сөендерә. Бу көннәрдә артистлар иртәдән алып кичкә кадәр сәхнәдән төшми.
Спектакльнең режиссеры әйтүенчә, бүгенге көндә шактый гаиләләр аерылыша, сәбәбе бик гади булса да, алар өчен бу бик җитди булып тоела, ир белән хатын гаилә проблемаларының очына чыга алмый. Әлеге көнүзәк мәсьәләне нәкъ менә шуның өчен дә яңа сезонда алгы планга чыгарырга булганнар.
Премьераны тамашачылар 25нчы , 26 нчы һәм 27 нче август көннәрендә карый ала.
Динә Нәҗметдинова, Искәндәр Төмәнев, Татарстан Яңалыклары.
