Казанда Болгарда уздырыла торган Бөтенроссия мөселман яшьләре форумы ачылышы узды. Җыенны Татарстан мөселманнары Диния нәзарәте Ислам мәдәнияте, фәне һәм мәгарифенә ярдәм күрсәтү фонды белән берлектә оештырыла. Тулырак мәгълүмат хәбәрчебез язмасында.
Форум 2023нче елның 16-23нче августында Шәһре Болгарда палаткалы шәһәрчек форматында уза. Төп тема – мөселманнар арасында хәйрия эшчәнлеге. Форум эшендә Индонезия, Мисыр, Бөек Британия, Кырым, Башкортостан, Кабарда-Балкар, Чувашстан һәм Татарстан республикалары, Пермь крае, Мәскәү, Әстерхан, Владикавказ, Свердловск өлкәләре, Ижау, Йошкар-Ола, Самара һәм Ханты-Манси төбәкләреннән 18-30 яшьлек 100 артык мөселман катнаша.
Форумның төп максаты – яшьләрнең башлангычларына үсәргә мөмкинлек бирүче мохит тудыру, мөселман яшьләренә тормышта үз-үзен табарга ярдәм итү, рухи дөньяны баету. Мөселман яшьләре иҗади һәм гамәли чаралар аша үзләре уйлап тапкан яңа социаль проектларны тормышка ашырырга өйрәнә ала.
Форум Россия өммәте файдасына социаль проектлар булдыру һәм гамәлгә ашыру өчен мөмкинлекләр мәйданчыгы була. Форумда катнашучылар стартапларны гамәлгә ашыру буенча танылган белгечләрдән мастер-класслар һәм консультацияләр ала. Моннан тыш, форум нәтиҗәләре буенча иң яхшы проектлар сайлап алына.
Форумда проектларны камилләштерәчәкләр һәм федераль грантлар конкурсында катнашырлык дәрәҗәгә җиткерәләр. Форум программасында шулай ук дини юнәлештә белем эстәү, фәнни-танып белү өчен лекцияләр, тренинглар, мастер-класслар һәм практикалар каралган.
Искәндәр Гыймалтдинов, Ирек Хәмидуллин, Татарстан яңалыклары
