Хәерле көн, мөхтәрәм телевизор караучылар! Татар матбугатында нинди вакыйгалар алгы планга чыга? Әйдәгез бергәләп шушы сорауга җавап биреп карыйк.
Илдәге бөтен исәп-хисап эшен алып баручы Росстат белдергәнчә, Россиядәге балалы гаиләләрнең 14 процентында акча ашарга гына җитә. Ә 1 процентында хәтта ашарга да җитми икән. Аңлашыладыр, бу әле бик йомшак кына итеп әйткәндә. Бу хәлне ничек төзәтеп була дигән сорауга ЛДПР партиясе депутатлары яраклылык вакыты чыгып барган продуктларга салымны бетереп, аны халыкка бушлай бирү турында тәкъдим керткәннәр. “Шәhри Казан” газетасы бу турыда тәфсилле язма бастырган. Яхшы ниятләре өчен рәхмәт депутатларга. Ләкин ният белән чынбарлык арасында бик зур ара бар шул. Бездә ул кибетләрдә саклау вакыты әлләничә тапкыр чыккан азык-төлекне дә оста гына сатырга өйрәнеп беттеләр шул инде. Ул көнгә калырга язмасын дип кенә телик.
Газета күренекле артистларның бакча тормышлары турында сөйләргә алынган. Беренче булып татарстанның халык артисты Әсхәт Хисмәт бакчасында кунак булган журналист. Безнең халык койма ярыгыннан гына күршесендәге хәлләрне күзәтергә яратканын истә тотканда, илгә-көнгә танылганнарның тормышын белергә тырышу турында әйткән дә юк инде. Әсхәт абый, ихлас кеше буларак, барысын да күрсәткән, бөтен нәрсә турында да сөйләп биргән. Хисмәтнең бакчасы гына түгел, үзе дә хикмәт шул, сөбханаллаh!.
Соңгы арада коеп-коеп китә торган яңгырлар урак эшенә тоткарлык ясамыймы? Болай да корылыктан зыян күргән басулардагы ашлыкны югалтуларсыз җыеп ала алырбызмы? Әлеге сорауларга ачыклык кертү өчен “Ватаным Татарстан” газетасы журналисты Теләче районы кырларын әйләнеп кайткан. Җыеп кына әйткәндә-быел иген уңышы былтыргының яртысы чамасы гына булыр дип көтелә. Нишләмәк кирәк, барына бәрәкәт бирсен дибез.
Белем көненә әле төгәл бер ай вакыт бар. Хәстәрле әти-әниләр уку кирәк-яракларын сатып ала башлаган инде. Әмма, өлгерербез әле дип, август азагын көтүчеләр дә җитәрлек. Быел бер укучыны мәктәпкә әзерләү 20-30 мең сум чамасына чыга икән. Аңлашыладыр, икешәр-өчәр укучысы булганнарга мондый чыгымнарны күтәрү бер дә җиңел булмаячак. Балалар товарларын җитештерүчеләр моны үзләре дә аңлый, дип яза шул ук “Ватаным Татарстан” газетасы журналисты. Алар hәр гаиләнең мөмкинлеге җитәрдәй мәктәп кирәк-яраклары җыелмасы булдырырга тәкъдим итәләр икән. Бу уңайдан газета хәбәрчесе кибет-базарлардагы бәяләрне hәм әти-әниләрнең кәефен белешкән. Белеп тору өчен генә түгел, алдан аяк киенү өчен дә файдалы булыр бу язма.
Артистлар тормышын күзәтеп баручыларга бу юлы газетада Динә hәм Рафаиль Латыйповларның тормышы турында әлеге дуэтның-сыңары- Динә ханымы белән әңгәмә бирелгән. Шөкер итә белгән артист турында бик күп мәгълүмат бирелгән анда.
Дөньядагы каршылыклардан зарланмыйча, биргәненә шөкер итеп яшәүчеләрдән булсак иде дигән теләктә бүгенгә сезнең белән сабуллашам. Исәнлектә күрешик!
