Балтач районы Бөрбаш авылында мөселман балалар Сабан туе узды. Ул башкаларыннан кай ягы белән үзгә? Хәбәрчебез Мөршидә Җиһан репортажы.
Чын күңелдән зурлап каршы алган дуслар шәрәфле кунаклар, төрле дәрәҗәдәге җитәкчеләр, дин һәм җәмәгать эшлеклеләре, татар зыялылары, галимнәр Сабан туеның тау башындагы беренче капкасыннан мәйданга узды.
XVI тапкыр оештырылган Россиякүләм чарада яңгыр сибәләштергәләп алса да халык күп булды.
Бөрбаш авылында мөселман Сабан туен үткәрүнең үз таләпләре бар .
Моннан тыш Сабан туе мәйданының хуҗалары — балалар. Гадәти ярышлар белән беррәттән дога, сурәләр уку да әлеге сабан туеның төп үзенчәлеге.
Мөселман балалар сабан туена хәер-фатыйха биреп ачып җибәргән Җәлил хәзрәт Фазлыев Дин ул – әманәт аны сакларга һәм аны үзебездән соңгы буыннарга тапшырырга, балаларны дин кушканча тәрбияләргә өндәде.
Тантаналы ачылышта чыгыш ясаучылар да ил –көнгебезгә тынычлык һәркемгә сәламәтлек теләп , мөселман сабаг туеның тәрбияви әһәмиятен ассызыклады.
Мөселман балалар сабан туен үткәрелә башлаган көннән тулы бер буын үсеп җитте. Бөрбаш авылының көннән –көн үсеше дини-әхлакый нигез ныклыгында.
Сабан туе Бишектәге сабыйлардан алып өлкән яшьтәге әби -бабайларны бер мәйданга китергән. Шул исәптән Фирүзә һәм Рәхимҗановлар гаиләсе дә биредә.
Азан яңгырый, ә бу бар халык намазга баса дигән сүз. Мәйдан тулысы белән намаз уку урынына әверелде.
Ел да меңләгән кеше җыелган мөселман балалар сабан туен үткәрүгә ярдәм кулы сузучы иганәчеләр дә бар әлбәттә, шулай ук җирле хакимият тә мәйдан түрендә.
Ә көрәштә үсмерләр 5 үлчәү категориясендә бил алышты. Хәзрәтләр һәм имамнар арасында да милли көрәш ярышлары узды. Беренче батырга – тәкә , яшүсмерләр арасында җиңүчегә скутер тапшырылды.
