Адәм баласын хафага салу өчен дә, шөкер иттерү өчен дә күп кирәкми. Әле июнь аенда да сукранып мичкә яккан авыл кешесен июль башындагы челлә, куркуга салып кына калмыйча, авыруга сабыштырды. Корылыктан саргайган табигать халәте күпләрне йокысыз калдырды. Ә инде Аллаhның рәхмәте белән коеп яуган яңгырлар бер мизгелдә барысын да үз урынына куйды. Шушы каршылыклы җәйнең төп уңайсызлыгын “Шәhри Казан” газетасы беренче битенә чыгарып биргән. Ә инде язманың исеменә килсәк-“Бәрәңгегә су сибәргәме?” дигән сорау ул- риторик ,ягъни җавапсыз да аңлашыла торганнардан. Бирмим дисә, безнең бу гамәлебез көлгә су сибүне генә хәтерләтәчәк. Иң элек күңелләребезне кыргаксынудан сакласак иде.
Тормышта авырлыкларсыз гына булмый. Шуңа да бөтен нәрсәгә дә фәлсәфи күзлектән, тормыш тәҗрибәсеннән чыгып карарга өйрәнергә кирәк. Шул ук “Шәhри Казан” газетасының иманлы сүз сәхифәсендәге язма моны тагын бер кат раслый.
Курган өлкәсендәге 7 май көнне сәгать ярым вакыт эчендә көлгә әйләнгән Йолдыз авылы бүген ни хәлдә? Андагы халык нинди өметләр белән яши?” “Ватаным Татарстан” газетасы хәбәрчесе Йолдызның бүгенгесе белән таныштыра. Гыйбрәтләр алыр өчен менә дигән язма.
Газетаның манзара сәхифәсен көтеп алучыларга бу юлы татар эсрадасының иң тырыш hәм зәвыклы җырчысы Раяз Фасыйхов белән әңгәмә тәкъдим ителгән. Артистның:”Горурлык ул- безнең таныклык” дигәне белән килешәсең ул язманы укыгач.
Хәзер журналлар турында. “Казан утлары”ның июль саны Татарстанның халык шагыйре Зиннур Мансуровның “Каршылыклы хисләр карулаша»”дигән шигри тупламы белән ачыла. Шагыйрьнең hәр шигыре халкыбызның авырткан җирләре-яралары турында. Аларны укуы ,җырдагыча әйтсәк, кыен да, рәхәт. Язучы Рафис Корбанның “Артык кешеләр” роман-эссесе исә безне совет чоры золымына дучар булган күренекле шәхесләребезнең катлаулы язмышлары турында. “Мин бу әсәремне документаль фактларга нигезләнеп яздым” дигән иде бер әңгәмәсендә Рафис. Романның дәвамы журналның киләсе санына калган.
“Сөембикә” журналындагы язмалар арасында дүрт бала белән тол калган Светлана Ибраhимованың ачылып сөйләве мәшhүр җырчыбыз Ренат Ибраhимовны тагын да ныграк аңларга ярдәм итә. Җырчының рухы шат булсын, ә Светлананы Аллаh ярдәменнән ташламасын.
“Тормышымдагы төп максатым- кешеләргә файда китерү hәм үземнән соң эз калдыру. Мәңгелеккә эз калдыра алсам, бик бәхетле булачакмын. hәр кеше дә шулай дип яшәсен иде!” Матди байлыкка ирешеп тә тормышка фәлсәфи күзлектән карый белгән, күңеле изгелек белән сугарылган, җанында иман нуры балкыган Ильяс Гыймадов әнә шулай дип ярып салган.
Арабызда Ильяс Гыймадов кебек зыялы, иманлы бәндәләр күбрәк булса иде дигән теләктә бүгенгә сезнең белән саубуллашам. Исәнлектә күрешик!
