Түбән Кама районы Түбән Чаллы авылында “Туганнар җыены – җиде буын очрашуы” дип аталган бәйрәм узды. Әлеге чара шушы авылда гомер иткән Зәйнулла бабайның дәвамчыларын берләштерде. Нәкъ шушы җирлектә аларның нәсел җебе башлана да. Туганнар җыеныннан безнең киләсе язмада.
Шунысы игътибарга лаек, һәр буын вәкиле үзен таныту өчен төрле төстәге киемнәрдән килгән. Әлеге нәсел дәвачылары Татарстан районнарында гына түгел, Россия төбәкләрендә дә таралып гомер итә.
Туганнар җыенына чакырулы иң өлкән кеше Әбүбәкер бабайга 95 яшь. Буыннар чылбырын барлау нияте белән ул Яңа Чишмә районыннан ук килгән.
Сәхнәдә җыр-биюләр, нәфис сүз осталары ямьле чыгышларын бүләк итсә, мәйданның икенче башында бай күргәзмәләр эшләде.
Һәр нәсел дәвамчысы вәкилләре кул эшләре, әби-бабаларыннан мирас булып калган көндәлек кирәк-яракларын алып килгән. Нәселләрендәге танылган шәхесләр турында стендлар, шәҗәрә агачлары төзегәннәр.
Шулай ук биредә кайсы гаиләнең нинди милли ризыкны яратып әзерләгәнен дә күрергә мөмкин иде.
Чыннан да Зәйнулла бабай нәселе өчен тарихка кереп калырдай күркәм бәйрәм булды. Алга таба да туганнар җыены һәммәсен җыяр,очраштырыр дигән өмет белән таралышты алар.
