КФУның Филология институтына 2023 елга кабул итү кампаниясе турында матбугат конференциясе булып узды. Чарада КФУның Филология һәм мәдәниятара багланышлар институты директоры Рәдиф Җамалетдинов, КФУның Габдулла Тукай исемендәге Милли мәдәният һәм мәгариф югары мәктәбе деканы Рамил Мирзаһитов катнашты.
Институт базасында ике һәм күп телле белгечләр әзерләү буенча сөйләшенде. Россиядә тиңе булмаган программа гамәлгә ашырыла. Яшь белгечләр өч телдә укыта алачак: рус, татар һәм инглиз телләрендә. Быел ике телле белгечләрнең беренче чыгарылышы булды. КФУның Филология һәм мәдәниятара багланышлар институтына 25 июльгә кадәр әлеге белем бирү юнәлешләренә гаризалар тапшырырга мөмкин. Бу турыда Филология һәм мәдәниятара багланышлар институты директоры Рәдиф Җамалетдинов сөйләп үтте.
Казан федераль университетының Габдулла Тукай исемендәге Милли мәдәният һәм мәгариф югары мәктәбе татар телендә югары белем бирүче уку йортларының берсе булып тора. Әлеге бүлекне тәмамлаган кешеләр арасында күп кенә танылган язучылар, журналистлар, сәясәтчеләр бар. Әлеге югары мәктәпнең деканы Рамил Мирзаһитов әйтүенчә, татар теленнән бердәм республика имтиханын тапшырып, бер югары уку йортына да кереп булмый.
Югары уку йортына керер өчен бөтен абитуриентлар да барлык фәннән бердәм дәүләт имтиханын тапшырырга тиеш, яисә барлык бала да институтта тест рәвешендә эчке имтихан тапшыра. Югары мәктәпкә Башкортстан, Чувашия, Пермь һәм башка төбәкләрдән укырга килүчеләр бар.
