Башкалабыз Казанда «Хәрәкәттә – бәрәкәт» дип исемләнгән проект дәвам итә. Бу көннәрдә чираттагы дәрес Себер татарлары биюләренә багышланды. Казан халкы һәм кунаклары Себер татарларының халык авыз иҗаты, бию көйләре, милли кием үзенчәлекләре , бию уеннары белән дә таныша алды.
Исегезгә төшерәбез, быел проектның дәресләре Галиасгәр Камал театры янында, атнаның һәр пәнҗешәмбе көннәрендә уза.Бу атнада, ягни 6 нчы июльдә, әлеге чара Башкортостаннан килгән кунаклар катнашында узачак. Хәрәкәттә-бәрәкәт проектының чираттагы беренче җәйге дәресендә хәбәрчебез Искәндәр Гыймалтдинов та булып кайтты.
Себер татарларының фольклор бию үрнәкләренә багышланган «Аяк-уен» программасы биючеләрнең перформансыннан башланды. Әлеге программа кысаларында тамашачылар арасында интерактив уздырылды, катнашучылар Себер татарларының халык авыз иҗаты, бию көйләре, милли кием үзенчәлекләре һәм биюле уеннары белән танышты.
Себер татарларының халык җырлары ятаган, нугай-курай, думбра кебек музыка уен коралларында башкарыла. Себер татарларының бию үзенчәлеге — тыпырдап бию.«Хәрәкәттә — бәрәкәт» бию дәресләрен Казан мэриясе Парклар һәм бакчалар дирекциясе белән берлектә оештыра. Башка еллардан аермалы буларак, бу юлы проект бары татар бию төрләрен өйрәнүгә багышлана.
Искәндәр Гыймалтдинов, Ильдар Галяутдинов, Татарстан яңалыклары.
