Бүген районыбыз көрәшчеләре алда торган хәлиткеч бил алышуларга әзерләнә. Сабантуй алдыннан алар ничек мускул ныгыталар? Ничек җиңүгә омтылалар? Кыскасы, келәмдә нинди хәлләр? Әлеге сорауларга җавапны хәбәрчебез күп көрәш батырлары тәрбияләгән “Батыр” спорт мәктәбендә эзләде.
Абыйлы-энеле Әюп һәм Али Сөләймановлар бу көннәрдә аеруча күп вакыт келәмдә үткәрәләр. Бер-берсе белән бил алышалар, башкаларның көчен сынап карыйлар. Тренердан иң кирәкле киңәшләрне алалар. Туганнарның олырагы унҗиде яшьлек Әюп бишенче сыйныфтан бирле көрәшә. Егетнең инде телгә алып сөйләрлек җиңүләре дә бар.
Үсмерләр әлеге спортка әтиләре теләге буенча киләләр. Тора-бара үзләре дә нык мавыгып китәләр. Якын киләчәккә хыяллары киләсе Сабантуй батыры булу булса, киләчәктә спорт остасына ирешергә телиләр. Унбиш яшьлек Али фикеренчә, көрәш аларны дисциплинага да өйрәтә.
Көрәшчеләрне соңгы ике елда тренер Борис Лукьянов өйрәтә. Бил алышуларда хөкемдар ролендә дә булган остаз фикеренчә, келәмдә уңышка ирешү өчен һаман күнегүләр үткәрергә, шулай ук имгәнүләрдән һәм ялгышудан сакланырга кирәк.
Сүз уңаеннан, 1999 елда ачылган “Батыр” спорт мәктәбе нигездә көрәшчеләр әзерләүгә махсуслаша. Биредә тәрбияләнеп чыгучылар арасында яшьләр генә түгел, өлкәннәр арасында мәйдан тотучылар да бар.Сабантуйга санаулы көннәр калып калып барганда көрәшчеләребезгә келәмдә лаеклы көндәшләр һәм уңышлар телибез.
Камилә Мусина, Илнур Кадыйров, Татарстан яңалыклары.
