Май аеның соңгы көннәре, бу атнада җәйгә керәбез. Мәктәп укучыларының җәйге каникулы, өлкәннәрнең отпуск чорлары. Планнарыбызның күбесе һава торышына бәйле бит. Хәзер без синоптиклар фаразлары турында хезмәттәшем Ания Гыйбадуллинадан белешербез.
Узган атнада көннәрнең 33 градуска кадәр җиткән эсселеге яллардагы җиләс, яңгырлы һава белән бераз суынды. Явым-төшемнәргә яшеллек, игенчеләр аеруча сөенде. Белгечләр хәбәр иткәнчә, Казанда 25 майда температура рекорды яңартылган. Башкалабызның Авиатөзелеш районында урнашкан метеостанция мәгълүматлары буенча, һаваның максималь температурасы +30°тан арткан. Казанда 25 май өчен һава температурасының элеккеге абсолют максимумы 1905 елда теркәлгән булган һәм +30,6°С тәшкил иткән.
Атна дәвамында алмашынучан болытлы һава көтә. Җәйнең беренче аен без уртача температура белән каршыларбыз. Бу турыда тулырак безгә хәзер белгеч сөйләп китәр.
Җәй – эссе көннәр һәм суда коену вакыты. Сезон бу атнада, төгәлрәге 1 нче июньдә, башлана. Белгечләр башкаланың 9 мең кв.м га якын мәйданлы сулыкларның төбен һәм яр буйларын тикшерде. Шулай ук алар су һәм комга лаборатор анализ үткәрә, мәгълүмат такталарын яңарта. Пляжларның әзерлеген шәһәр районнары администрацияләренең махсус комиссияләре тикшерә.
Бу җәйдә башкала халкы өчен биш пляж ачылачак: «Локомотив», «Түбән Заречье», «Тирән күл», «Комсомол күле», «Зур Аккош күле». Шулай ук су янында өч ял урыны оештырылачак: «Аккош күле», «Зөбәрҗәт күле», Җиңү паркындагы күл. Бу объектларда 30 нчы августка кадәр 9:00 дән 20:00 гә кадәр өчәр коткаручы һәм бер медицина хезмәткәре кизү торачак. Барлык пляжлар көймәләр, коткару җиһазлары һәм медикаментлар белән комплектлана.
Хөрмәтле телевизор караучылар! Җәй көне иминлек мәсьәләләренә, бигрәк тә балаларга карата игътибарлырак булсагыз иде. Эсселектән саклану чаралары турында да онытмагыз!
