Музыкага чикләр юк. Казанда елның иң көтелгән музыкаль вакыйгасы — ТМТВ музыкаль премияләрен тапшыру тантанасы узды. Артистлар белән Айзилә Батырханова да аралашып кайтты!
Кызыл келәм, фото видеокамера һәм алкышлар. Инде 8 ел ТМТВ музыкаль премиясе — язның төп музыкаль вакыйгасына әверелә. Бу гаҗәп түгел, чөнки тантанада тамашачы яраткан артистлар, сәхнәдә заманча бизәлеш һәм көтелгән абруйлы бүләк!
Премия кагыйдәләренең берсе – кием белән шаккатыру. Зур тамашага дип артистлар берничә кием әзерли! Кызыл келәмнән дә үзенчәлекле итеп узарга тырышалар.
Шулай да тантанада мөһим урын җырга бирелә!
Бу кичне «Пирамида» концерт залында алма төшәргә дә урын юк иде, тамашаны үз күзләре белән күрергә теләүчеләр билетларны берничә ай алдан сатып алган. Ә йөзләрчә мең тамашачы премияне ТМТВ телеканалында туры трансляция аша карый алды.
Быел тантана «музыкага чикләр юк» дигән шигарь астында узды һәм чын мәгънәсендә елның мөһим вакыйгасына әверелде: югары дәрәҗәдә сәхнә бизәлеше, кабатланмас номерлар!
ТМТВ музыкаль премиясе сыны һәр башкаручының хыялы. Артистлар өчен бу халык мәхәббәте символы! Автор башкаручы Фирүзә өчен бу бишенче премия!
ТМТВ премиясендә җыр-моңга чыннан да чикләр юк. Хәтта рус башкаручылары да татарча җырлый! Татарстанның атказанган артисты Роман Плеханов моның ачык мисалы!
ТМТВ премиясе – музыка һәм үзенчәлекле образлар бәйрәме дисәк тә була. Әйтергә кирәк, бу кичтә Дилә Нигъмәтуллина күпләрне шаккатырды.
Премиядә Сәхнәдә беренче адымнарын ясаучылар да, татар эстрадасы мэтрлары да чыгыш ясады!
Барлыгы 30 башкаручы дәрәҗәле ТМТВ премиясенә лаек булды! Ә аларның җырларын тамашачылар никадәр яратканы алкышлар көче белән исәпләнә!
Айзилә Батырханова, Альберт Сафиуллин, Татарстан яңалыклары
