Россия Президенты Владимир Путин «Россия – ислам дөньясы: KazanForum 2023» XIV Халыкара икътисади форумы катнашучыларына сәламләү телеграммасы юллаган. Аның тексты Кремль сайтында басылып чыкты.
Россия Президенты Татарстан Республикасы башкаласы чираттагы мәртәбә «күп кенә илләрдән килгән кунакларны җылы каршы ала, масштаблы чаралар үткәрү өчен абруйлы, кирәкле мәйданчык статусын раслый», дип билгеләп үтте.
Путин искәрткәнчә, Россияне традицион рәвештә ике яклы характердагы һәм Ислам хезмәттәшлеге оешмасы белән үзара элемтә кысаларында мөселман дәүләтләре белән тыгыз һәм ышанычлы мөнәсәбәтләр бәйли. Владимир Путин Россия хәзер актив үсештә булган ислам илләре белән эшлекле һәм гуманитар хезмәттәшлек өчен ачык дип белдерде.
«Без булдырылган мөнәсәбәтләрне ныгыту, аграр һәм сәнәгать кооперациясен үстерү, яңа транспорт-логистика челтәрләрен булдыруда яңа партнерлар табу белән кызыксынабыз. Халыкара элемтәләрне киңәйтүдә Россия мөселманнары әһәмиятле роль уйный. Моны әлеге форумны уздыру раслый», – дип өстәде ул.
«Россия — ислам дөньясы» стратегик күзаллау төркеме һәм KazanForum Халыкара икътисади форумы эшчәнлеге киләчәктә дә Россия һәм мөселман илләре бизнес-берләшмәләре арасында үзара хезмәттәшлекне ныгытуга ярдәм итәр, төбәкара һәм дәүләтара дәрәҗәдә уртак проектлар өчен яңа мөмкинлекләр ачар дип ышанам», — дип йомгаклады Владимир Путин һәм чарада катнашучыларга нәтиҗәле эш теләде.
«Россия – ислам дөньясы: KazanForum» Халыкара икътисади форумы Казанда 18-19 майда узачак. Әлеге зур вакыйга 200дән артык чараны үз эченә ала, аларда Россиядән һәм мөселман илләреннән 15 мең кеше катнашачак.
