Тирә-юнебезгә ямь бирүче, сулар һавабызны чистартучы агач-куаклар утырту – изге эш. Бу көннәрдә оешма-предприятие һәм мәктәп коллективлары агач утырту буенча өмәләрдә катнаша. Шундыйларның берсе Зәй районында да узды. Биредә “Педагоглар аллеясы” барлыкка килде”. Зәй педагоглары Ринат Фәрдиев исемендәге ял паркында агач утырттылар. Изге эштә Зәйдзге хәбәрчебез Әдилә Борханова да катнашты.
Ринат Фәрдиев исемендәге ял паркының икенче өлешенә укытучылар агач утырта. Биредә хәзер “Педагоглар аллеясы” барлыкка килә. Бу Укытучы һәм остаз елы уңаеннан оештырыла. Игелекле эштә район җитәкчелеге дә катнаша.
Аллеягә беренче каенны мәгариф идарәсе башлыгы үзе утыртты. Бакча мөдирләре, мәктәп директорлары бердәм булып 300 төп каен агачлары, куаклар утырталар. “Теремкәй” балалар бакчасы җитәкчесе Рәзинә Борһанова бу эшне әһәмиятле чара дип саный. Районыбыз табигатен тагын да ямьле итүне үзебез кайгыртырга тиешбез дигән фикердә. Укытучыларга “Легенды 17” студентлар отряды да бик теләп булышты. Алар арасында булачак педагоглар бар. “Педагоглар аллея”сенә яшьләр дә үз өлешләрен кертте.
