26 ынчы апрель. Олуг бәйрәм. Габдулла Мөһәммәтгариф улы Тукаев — Габдулла Тукайның туган көне. Бәйрәм тантанасы Бөек Тукаебызның һәйкәленә чәчәкләр салу белән башланып китте. Чарада Татарстан Республикасы Рәисе Рөстәм Миңнеханов һәм күп санлы татар җәмәгатьчелеге катнашты.
Габдулла Тукай татар халкының үткәне, бүгенгесе һәм чын ышаныч белән әйтә алабыз, ул аның киләчәге дә. Моңа бернинди шигебез юк. Инде озак еллар буена без аның тормышын, иҗат юлын өйрәнәбез. Әле һаман да өйрәнеп бетә алмыйбыз кебек. Чөнки, иҗат тирәнлеге, гомер озынлыгы белән бәйләнмәгән. Балалар бакчасындамы, әллә инде мәктәп яшендәге үсмерләрме, шагыйрь- шагыйрәләр дисеңме, олпат язучылар, авыл –калалардагы тамаша залларындамы, зур мәйданнар тоткан барлык җәмагатьчелек күңелендә, төрле телләрдә, җир шарының төрле илләрендә Тукай шигърияте яңгырый.
Әйе, Габдулла Тукаебыз гомере буена үз халкым, дип, туган илем, газиз туган җирем,-дип аның кайгысын кайгыртты, моң- зарын тыңлады, шатлыгына кушылып шатлана белде. Илебез, дәүләтебез, Халкыбыз Габдулла Тукайны баш иеп хөрмәтли икән, бу бөек татар халкына хөрмәт, милләтебезнең бәгыренә сеңеп калып буыннардан- буыннарга баручы иҗатка дан җырлау.Бәйрәм тантанасы “Мин татарча сөйләшәм” яшьләр оешмасы оештырган тамаша белән дәвам итте.
Фәннур Хәсәнов, Ринат Сәхипгәрәев. Татарстан яңалыклары.
