Галиәсгар Камал исемендәге татар дәүләт академия театры сәхнәсендә “Нур” Уфа дәүләт татар театры 25 апрельдан башлап 28 нче апрельга кадәр Казан тамашачасын “Фатыйма”, “Көлмәгез,мин үләм”, “Хыял йорты”, “ Бер мәл шәһәрдә”, “Галиябану” кебек спектакльләр белән сөендерәчәк.
24 нче апрель, ягъни бүген, “Сәйдәш” Мәдәният үзәгендә “Сөембикә” журналының 110 еллык юбилеена багышланган бәйрәм концерты. Чарада Рөстәм Асаев, Гөлшат Имамиева, Зөлфия Вәлиева, Әсхәт Хисмәт кебек артистлар чыгыш ясый. Лауреат исеменә лаек булучыларга “Сөембикә” беләзәге” тапшырылачак дип көтелә.
25 нче апрель көнне Кәрим Тинчурин исемендәге татар дәүләт драма һәм комедия театрында “Алай түгел, болай ул” спектакле. Җырлы-биюле комедия мәхәббәт, кешелеклелек, гаилә бөтенлеген саклау кебек темалар белән сугарылган.
29 нче апрель көнне Әлмәт татар дәүләт драма театрында “Син кайда идең?” спектакле. “Мәхәббәтнең яше юк” диләр. Алар бик ук яшь булмаса да, бер-берсенә гашыйк булалар, ләкин күршеләр, хәтта газиз балалар да картларның мәхәббәтенә каршы төшә. Сөйгән ярлар бергә булачакмы? Бу турыда сез спектакльне карап белерсез. 7 апрельдан алып 7 майга кадәр Заманча сәнгать Галереясендә Фәрит Гөбаевнең фотокүргәзмәсе узачак. Сезне көтеп калабыз.
2022 елның 23 декабреннән башлап 2024 елның 31 маена кадәр Ислам мәдәнияте музеенда «Үзгәрешләр чоры мәдрәсәсе» күргәзмәсе дәвам итәчәк. Экспозиция Казан Мөхәммәдия мәдрәсәсенең 140 еллыгына һәм аңа нигез салучының, татар дин эшлеклесенең, педагог Галимҗан Барудиның 165 еллыгына багышланган.
23 нче апрель көнне Аяз Гыйләҗев исемендәге Чаллы татар дәүләт драма театрында “ Җаның ни тели?” спектакле. Авылда көннән-көн йортлар сирәгәя, урамнар кими. Тиздән бу урында завод төзеләчәк. Кирәк-яракны алып китәр өчен нибары ике атна вакыт калган. Авыл халкы авылда калыр өчен нинди адымга бара? Дәвамын спектакльне карап белерсез.
