Бүген газлаштыру чорында яшәсәк тә, күпчелек авыл мичләрен сагына, кеше тормышы гомер-гомергә мич тирәсендә әйләнгән бит. Хәер, алар кайбер авылларда сакланган да. Бүгенге көндә мич чыгаручылар да күп түгел. Мамадыш районының политехник көллиятендә һөнәри осталык буенча чемпионатның төбәк этабы узды. Анда “Мич эше» компетенциясендә Татарстанның 5 районыннан студентлар катнашты. Аларның һөнәри осталыклары турында Мамадыштагы хәбәрчебез Гөлинә Гыйлмуллина язмасында.
Мамадыш колледжында инде өченче көн кызу – «Мич эше» компетенциясендә катнашучылар конкурс йөкләмәсен — урам өчен мич салу белән мәшгульләр. Финишка якынаючы конкурсантлар да билгеле инде, алар арасында Мамадыш колледжының 3 курс студенты Рөстәм Газизов та бар. “Минем мичләр салуда тәҗрибәм бар иде инде, шуңа күрә бүген минем өчен иң мөһиме — биремне вакытында үтәү», — ди ул.
Яшь мич салучыларга аркадан тыш: казан өчен мич, мангал, утын өчен махсус урын һәм торба җыярга кирәк була. Аларны үтәү өчен 22 сәгать бирелә. Эш барышын экспертлар күзәтә.
Мич эшенә беркайда да өйрәтмиләр. Ләкин бу компетенция чемпионат исемлегендә булганлыктан, студентларны бу авыр эшкә өйрәтү укудан буш вакытта алып барыла.
Мич эшеннән тыш, параллель рәвештә «Авыл хуҗалыгы биотехнологияләре» компетенциясе буенча да сынаулар уза. Әтнә авыл хуҗалыгы техникумыннан бу юнәлештә катнашучы Дарья Павлычева биредә инде икенче ел катнаша. «Ветеринария юнәлеше бученча укысам да, биотехнология миңа бик кызык», ди кыз.
Шунысы игътибарга лаек, бу компетенциягә вариатив модульләр дә кертелгән, ягъни эш бирүче тәкъдиме буенча, бу җиңүчеләргә киләчәктә эшкә урнашуны гарантияли.
Региональ этап җиңүчеләре агымдагы елның сентябрендә Бөек Новгород шәһәрендә чемпионат финалында катнашачак.
Гөлинә Гыйльмуллина, Фәүзия Нургалимова, Тимур Мөхәммәтханов, Фаил Шәйхетдинов.