Зәңгәр ягулык — һәр йортта булырга тиеш. 2021 нче елдан Россия президенты Владимир Путин йөкләмәсе нигезендә “Догазификация — газга тоташтыру” федераль программасы гамәлгә ашырыла башлады.Программаның төп максаты – газ бүлү челтәрләре булган торак пунктларда газлаштырылмаган шәхси йортларны зәңгәр ягулык белән тәэмин итү, җир кишәрлекләре чикләренә кадәр газны түләүсез җиткерү мөмкинлеген булдыру. Татарстанда бушлай газлаштыру проекты тулы күэтенә дәвам итә. Әйтик, Апас районында да яңа йорт төзеп чыгучылар, әлеге программа ярдәмендә газлы булды.
Апаста яшәүче Азат һәм Гүзәл Сафиннар яңа йорт өлгерткәннәр. Узган ел гаилә газлаштыру программасы ярдәмендә йортка газ үткәрү бәхетенә дә ирешкән.Газга тоташтыру программасы Апаста яшәүче Марат һәм Айсылу Галиуллиннарны зур чыгымнардан азат иткән. Гаилә моңа сөенеп туя алмый.
Безнең гаилә өчен көтелмәгән бүләк булды. Бер ай ярымда йортыбыз кишәрлегенә газүткәргеч сузылды. Безнең йорт аерым урында урнашкан. Янәшәбездә башка йортлар юк. Шуңа газ кертү мәсьәләсе җиңел генә хәл ителер дип уйламаган да идек, -ди алар.
Өй эчендә башкарылган эшләр өчен йорт хуҗасы үзе түли.Газ үткәрү өчен дәүләт тарафыннан субсидия дә билгеләнгән. Бу җир кишәрлеге чикләре эчендә газлаштыру буенча проект һәм төзелеш-монтаж эшләренә, шулай ук йорт эчендәге газ җиһазларына һәм газ исәпкә алу приборларына тотылган чыгымнарга кагыла. Моңа 100 мең сумга кадәр субсидия каралган. Тик ул мөмкинлектән билгеле бер катлам кешеләре генә файдалана ала.Шунысы ачык районда “Догазификация — газга тоташтыру” федераль программасы уңышлы эшләп килә.
Алия Галиуллина, Гөлназ Вәлиева, Гадиль Галеев, Татарстан яңалыклары, Апас районы.
