Татарстан Авыл хуҗалыгы һәм азык-төлек министрлыгы вәкиле катнашында район комиссиясе хуҗалыкларда техниканың язгы кыр эшләренә әзерлеген тикшерде.
Эш сәфәре «Союз-Агро» җәмгыятеннән башланды. Биредәге заманча, көчле егәрле техниканың күплеге сокландыра. Әле быел гына да паркны 600 млн сумлык яңа техника белән баетканнар.
Актүбә төбәк комплексы җитәкчесе Хәлил Шәмсимөхәммәтов хәбәр иткәнчә, хуҗалыкны 17,400 мең гектарда күләмле эшләр көтә. Бүгенге көндә кырларга ашлама кертелә, агрегатлар тырмалауга керешә, чәчүгә төшәләр.
Татарстан Авыл хуҗалыгы һәм азык — төлек министрлыгы вәкиле Илдар Гаязиев җәмгыятьнең әзерлегенә югары бәя бирде, механиаторларны техниканы саклап тотарга, хезмәт куркынычсызлыгы кагыйдәләрен сакларга чакырды. Башка хуҗалыклар да көзге культураларга ашлама кертә, тырмалау эшләрен башкара, шушы көннәрдә арпа чәчүгә керешергә исәплиләр.
Алия Галиуллина, Резеда Шәрипова, Татарстан яңалыклары, Азнакай районы.
