“Мин инде 29нчы май, туган көнемә үзем үстергән кыярларны һәм кып-кызыл помидорларны бакчадан эзеп ашыйм”,- ди Апаста яшәүче Розания Зиятдинова. Ул — уңган, тәҗрибәле бакчачы. Яшелчәләре ел да бик мул уңыш бирә. Чәчкә-гөлләре дә шаулап үсә аның. Бакчачыдан файдалы киңәшләр, яшелчә үстерү серләре алдагы сюжетта.
Апаста яшәүче Розания Зиятдиновалар өендә чын яз сулышы. Һәр тарафтан җылылык, яктылык, нур бөркелә. Гөлләре шау чәчәктә аның. Үсентеләре дә күзгә күренеп күтәрелә. Быел Розания апа 100 төптән артык помидор, 70 төптән артык борыч утырткан.
Бу кәсепкә интернеттан укып та, үз тәҗрибәсеннән чыгып та өйрәнә. Яшелчә үсентеләреннән мул уңыш алу серләрен Розания Зиятдинова безнең белән дә уртаклаша, файдалы киңәшләрен бирә.
Орлыкларны гадәттә ул үзе үстергән яшелчәләрдән әзерли. Төрләргә килгәндә, помидор, борычларның күбрәк эре сортларына өстенлек бирә.
Тәҗрибәле бакчачы Розания апага үсентеләр өчен бүлмәдәге җылылык, туфракның дымлылыгы да мөһим. Ул аларны һәрдаим карап, тикшереп, кайгыртып тора. Чын күңелен биреп яратып эшләгәнгә ел саен мул уңыш ала.
Розания апа җыеп алган яшелчәләрне балаларына, туганнарына да өләшә. Үзләренә кышкы чорга салатлар ясый. Тәмле һәм файдалы тукланып, хезмәттән ямь, тәм табып яши бу гаилә.
Гөлназ Вәлиева, Гадиль Галеев, Татарстан яңалыклары, Апас районы
