Республикабызда оста куллы, иҗат дөнясына мөкиббән киткән кешеләр байтак. Алдагы видеоязмабыз әнә шундый берсеннән-берсе матур катиналар ясаучы Зәй районының Аксар авылыннан Сөенеч Галимова турында. Һөнәре буенча укытучы булып хезмәт куйган Сөенеч ханымны, картиналар иҗат итүгә нәрсә этәргән? Зәйдәге хәбәрчебез Әдилә Борһанова язмасында.
Аксар авылында яшәүче Сөенеч Галимованың йортында һәр бүлмә үзе ясаган картиналар белән бизәлгән. Сөенеч ханым белеме буенча педагог. 33 ел Аксар мәктәбендә математика, биология укыта. Шулай ук укучыларны рәсем ясау нечкәлекләренә дә өйрәтә. Лаеклы ялга чыккач кына, ныклап, картиналар ясауга алына.
Рәссамның иҗат галереясында натюрморт та, пейзажны да күрергә мөмкин. Берсендә сусыл җимешләр, икенче якта табигатьнең гүзәл мизгелләре сурәтләнгән. Махсус онлайн-дәресләрдә укып, осталыгын да арттыра.
Останың эшләр сандыгында 100 гә якын иҗат җимеше саклана. Күпчелек картиналары майлы буяулар белән ясалган. Ә палитрасында барысы 7 буяу, шуларны үзара кушып, төсләрне уйната. Һәрберсендә кабатланмас осталык, күңел җылысы сизелә. Рәсем матур килеп чыксын өчен аны оста итеп ясау гына аз, иң мөһиме – йөрәк җылысын салып, эшне яратып башкару мөһим, ди ул. Сөенеч Галимованы бигрәк тә көзге табигать илһамландыра.
Көзен, кышкы кичләрдә иҗат белән мавыкса, җәй көне Сөенеч Галимованың бакчасы гөлчәчәккә күмелә. Хәзер исә тәрәзә төпләре тутырып үсентеләр тәрбияли.
