Сүз — Актүбә урамында урнашкан 5 нче номерлы дәвалау корпусы турында бара. Ярты гасыр элек төзелгән объект, ташландык хәлдә. Теманы Түбән Камадагы хәбәрчебез Албина Вәлиева дәвам итә.
Кечкенә эскаватор рулендә — Дмитрий Матвеев. Ир-атка җаваплы эш йөкләнгән — элеккеге дәвалау корпусын сүтү. Бу өлкәдә аның тәҗрибәсе зур. Шулай да, өченче каттагы биеклектән бераз курку хисе бар, ди белегеч.
Әлеге бина 54 ел элек төзелгән. Монда төрле медицина учреждениеләре эшләгән. Хастаханә, бала тудыру йорты, репродукция һәм гинекология бүлекләре… 2015 нче елда объектны “Рубаха” үзәгенә бирмәкче иделәр. Тик төзекләндерү эшләре башланды да, ташланды. Нәтиҗәдә, бина – ташландык хәлдә калды. Тирә-якта яшәүчеләр мондый күршелеккә бер дә шат түгел.
Бинаны махсус комиссия җентекләп тикшереп чыга. Техник бәяләмә нигезендә, авария хәлендә дип танылган объектны сүтү турында карар чыгарыла.
