Сыерчыкларны — «яз хәбәрчеләре» диләр. Күчмә кошлардан алар беренчеләрдән булып очып кайталар. Сыерчыклар үзләренең матурлыклары, сайраулары белән сокландыра.Зәй районының 9 нчы мәктәп укучылары да алар өчен оялар ясап, зарыгып көтәләр.
Сыерчыклар кайтуын Зәйнең 9 нчы мәктәп укучылары да зарыгып көтә. Ә хәзергә технология дәресендә канатлы дуслар өчен оя ясыйлар. Берсе детальләрне җыя, икенчесе кадак кага. Укытучылары әйтүенчә, бу балаларда кул эшләренә осталыкны арттырса, икенчедән табигатьне саклауга ихтирам тәрбияли.
Физик мөмкинлекләре чикле балалар мәктәбендә хезмәт тәрбиясе аеруча мөһим. Атнасына 5 сәгать технология дәресе укытыла. Дәресләрдә өйрәнгәннең көнкүрештә кирәге чыга . Мәктәпнең уңайлы шартлары булган үз остаханәләре бар.
Үз куллары белән ясаган ояның кадерен белә малайлар, чын күңелдән шатланалар. Өйчекләр тагын да матуррак, шул ук вакытта чыдамлырак булсын өчен ояларны махсус яндырып та алдылар.
Кош ояларын агачларга элгәннән соң, канатлы дусларның яңа йортларга урнашуын түземсезләнеп көтә егетләр.
Адилә Борһанова, Александр Тимофеев, Максим Майоров, Зәй хәбәрләре.
