Республика аграрийлары өчен иң җаваплы чор. Районнар язгы кыр эшләренә әзерләнү белән мәшгуль. Әйтик, МАмадыш раойнында, бүгенге көндә игенчеләр чәчү һәм җир эшкәртү техникаларын, ягулык-майлау материалларын, орлыкларны әзирлиләр. Язгы кыр эшләренә әзерлекне Мамадыштагы хәбәрчебез Илнур Юнысов та күреп кайтты.
“Энҗе” КФХ идарәчесе Кавис Мөбарәкшин бүгенге аграр чаралар белән таныштыра. Чәчүлек материал җитәрлек итеп әзерләп куелган. Быел алар 300 гектар мәйданда бодай һәм арпа культуралары үстерергә ниятли. Тагын 50 гектарны күпьеллыклар тәшкил итә. Кече Кирмән авылындагы әлеге хуҗалык соңгы елларда биопрепаратлар белән эшли башлады. Үсемлекләрне яфрактан тукландыралар. Игеннәрдән мул уңыш җыеп алына. Ашлыкны сатып алучысы гына булсын.
Ашлыкны сату проблемасын хуҗалык өлешчә хәл итә алган. Ай саен 5-6 тоннаны күрше Норма авылындагы фермер ала. Моннан тыш, икмәк бәяләренә язгы акция игълан иткәннәр. Алардан кергән табыш язгы кыр эшләренә әзерлеккә тотыла. Техникалар һәм тагылма агрегатлар басуга чыгарга әзер диярлек.
Быел Мамадыш районында язгы кыр эшләре 50 мең гектар мәйданда узачак. Аның 25 мең гектары бөртеклеләр, калганы азык һәм техник культуралар өлешенә туры килә. Моннан тыш, 13,5 мең гектарда уҗым басуларын һәм 17 мең гектарда күпьеллык үләннәрне тукландырасы бар.
Киләсе атнада район хуҗалыклары өчен язгы кыр эшләре темасы буенча семинар-киңәшмә узачак. Ә апрель ае башында игенчеләрнең әзерлеген аграр министрлык белгечләре бәялиячәк.
Илнур Юнысов, Николай Михайлов, Илдар Хәсәнов, Фаил Шәйхетдинов, Татарстан яңалыклары, Мамадыш районы.
