Яз аеның тагын бер матур бәйрәме НӘҮРҮЗ. Ул 21 мартта көн белән төн тигезләшкән көнгә туры килә. Ә бу көннәрдә Казан ипподромында республикакүләм Нәүрүз бәйрәме үтте. Чарада төрле милләт вәкилләре бер мәйданда үз халыкларының мәдәни күптөрлелеген һәм гореф-гадәтләрен тәкъдим итте. Нәүрүз бәйремендә хәбәрчебез искәндәр Гыймалтдинов та булып кайтты.
Нәүрүз — төрки һәм Иран халыкларында яңа ел башлануын символлаштыручы борынгы бәйрәм. Аны язгы көн белән төн тигезләшкән көнне билгеләп үтәләр, Казанда гадәттәгечә табигатьнең һәм кешенең яңаруын чагылдыра торган тантаналы чаралар уздырыла.
Казан ипподромында төрки халыкларның Нәүрүз республика бәйрәме оештырылды. Республика «Нәүрүз» чын-чынлап халыкара бәйрәм булды. Төп сәхнәдә Татарстан халыклары Ассамблеясе милли-мәдәни берләшмәләре коллективлары катнашында күпмилләтле концерт программасы булды. Тамашачылар аларны бии-бии каршы алды.
Бәйрәмне оештыру һәм үткәрүдә Татарстан халыклары Ассамблеясе составындагы милли-мәдәни оешмалар катнаша. Азәрбайҗаннар, әфганнар, башкортлар, дагыстанлылар, казахлар, кыргызлар, таҗиклар, төрекләр, төрекмәннәр, үзбәкләр һәм башка халыклар бер мәйданда үз мәдәниятләре һәм гореф-гадәтләре күптөрлелеген күрсәтте.
Халык уеннары һәм күңел ачу чаралары балаларда аеруча куаныч уята. Бәйрәмнең аерылгысыз өлеше булып гастрономия өлеше тора, кунаклар милли кухня ризыкларын татып карый ала, кулинария мастер-класслары да уздырыла.
Чарада катнашучыларны җәмгыятьләрнең традицияләре һәм кәсепләре белән таныштыралар, бәйрәм мәйданчыгында милли җәмгыятьләр һәм чатырлар урнаштырылган иде, анда декоратив-гамәли иҗат эшләнмәләрен күрергә мөмкин иде.
Искәндәр Гыймалтдинов, Илдар Гәләүтдинов, Татарстан Яңалыклары
