Хәерле көн, мөхтәрәм телевизор караучылар! Татар матбугаты дөньяны нинди күзлектән күзәтә? Әйдәгез бергәләп шул хакта гапләшеп алыйк.
“Шәhри Казан” газетасы “Тәртип” радиосы үткәргән түгәрәк өстәлдән тәфсилле язма чыгарган. Анда сүз никах турында бара. Барыбыз да белә hәм хөрмәт итә торган Татарстан Диния назәрәте казые Җәлил хәзрәт Фазлыев никах өйдә укылырга тиеш дип саный. Алай гына да түгел, аерылышу очракларын киметү өчен ул бер чара да тәкъдим итә:”Мәhернең бәясен күтәрергә кирәк.
Аны кызның әтисе билгеләргә тиеш.”Алай-болай кызымны аерсаң,1 миллион сум акча бирәчәксең, дияргә тиеш ата кеше.. Без-кызларның бәясе булмаган бердәнбер халык”.Җәлил хәзрәт белми сөйләмәс дип әйтәсе генә кала.
“Ватаным Татарстан” газетасы да, сөйләшеп куйгандай, беренче битен кәләшләр җитмәү проблемасына багышлаган. Авылда эш булмаганлыктан яшьләр китә, бигрәк тә кызлар.Шул рәвешле авыл картая, буйдак егетләр арта. Бу хәлне бары тик ил күләмендәге реформалар белән генә үзгәртеп буласы аңлашыла язманы укыганда.
Кеше чакыртып өй җыештыруның ояты юк! дип башлана газетадагы тагын бер язма. Бу җөмләне укыгач ук башка бер уй килә:”Тәмам барып чыкканбыз икән!”. Өйдә пешермибез, өйгә кунак чакырмыйбыз, инде өйне дә үзебез җыештырмый башлаганбыз”.Белмәгәннәрнең күзен ачу өчендер инде, газета кеше яллап эшләтүнең ничә сум торуына кадәр тәфсииләп аңлаткан.Гомерең булса, әллә ниләр күрерсең әле диясе генә кала.
“Идел” яшьләр журналында яшьләр күзлегеннән чыгып, яшьләрчә язылган язмалар урын алган. Шулар арасында игътибарны җәлеп иткәне- яшь композитор Миләүшә Хәйруллинаның күңелен ачып биргән язма. Казанда ул иҗат иткән “Кави-Сәрвәр” операсының премьерасы булып узды. “Татар язучысы Кави Нәҗми hәм аның хатыны, танылган тәрҗемәче Сәрвәр Әдhәмованың саф мәхәббәтенә багышланган әсәр Миләүшәне җитлеккән талантлы композитор буларак раслады, дип яза журнал. Менә шул талант иясе:”Казанда музыкаль театр булдырырга вакыт җиткән дип саныйм дип белдергән.”hәр яктан да кадрларыбыз бар, алар җитлеккән. Минемчә. Без вакытны гына әрәм итәбез, чөнки яшь, сәләтле буын килде.” Бирсен Ходай, бәлки талантлы композиторның сүзенә колак салучылар табылыр.
Журналдагы тагын бер кызыклы язма-герой-шагыйрь Муса Җәлилнең беренче хатыны Зәкия Садыйкова hәм бүген Санкт-Петербургта яшәүче кызы Люция турында. Озак елларга Җәлил тормышыннан сызылган бу шәхесләрнең язмышы белән якыннан танышу кызыксынуны басу өчен генә түгел, ә гыйбрәт алу өчен дә кирәктер.
Укудан hәм фикерләүдән туктамасак иде дигән теләктә бүгенгә сезнең белән саубуллашам. Исәнлектә күрешик!
