Гаилә кору, тормыш кыйммәтләре, дини тәрбия. Актаныш районында “Гаилә мәктәбе” дип исемләнгән дәресләр башланды. Алар ай саен үткәрелә.Чиратттагы шундый дәрес районның мәктәп укучылары өчен оештырылды. Яшүсмерләр бәхетле гаиләне ничек күз алдына китерә? Бу сорауга җавап алдагы язмада.
Районның имам мөхтәсибе Руслан хәзрәт Мортазин укучыларга никахлашу йолалары хакында сөйли. Биредә югары сыйныф укучылары. Гаилә кору турында уйларга әлегә иртәрәк булса да, бәхетле гаилә һәм ир белән хатын кыз арасындагы мөнәсәбәтләре турында үз күзаллаулары бар инде.
Руслан хәзрәт яшүсмернең рухи сәламәтлегенә игътибар юнәлтсә, район үзәк хастаханәсе баш табибы урынбасары Анжелика Хөсәенова аларның физик сәламәтлеген күз уңында тотып чыгыш ясады. Мондый чаралар шуңа күрә дә бик әһәмиятле.
Яшь гаилә мәктәбе дәресләренең кирәклеген районның өлкән психологы Фәһимә Зиннуровна да ассызыклады. Булачак тормыш иптәшеңне сайлаганда дөньяга карашлар туры килүе мөһим диде ул.
Гаилә мәктәбе дәресләре ай саен диярлек үткәрелеп, яшь буынга дөрес тәрбия бирү юнәлешендә эшли. Киләчәктә язылышучылар саны артыр, моның белән бергә җирлекнең демографик хәле дә яхшырыр дигән өметтә калалар район ЗАГС бүлегендә.
АлияГалиуллина, Альбина Султанова, Марат Саррахов, Татарстан яжалыклары, Актаныш районы
