Дәүләт Советы Рәисе Фәрит Мөхәммәтшин видеоэлемтә режимында узган Россия Закон чыгаручылар Советы Президиумы утырышында катнашты. Утырышта Россия Федерациясе Президенты Владимир Путинның Россия Федерациясе Федераль Собраниесенә Юлламасын гамәлгә ашыру мәсьәләләренә аерым игътибар бирелде.
Анда, аерым алганда, югары мәктәпне реформалаштыру һәм икътисадның төрле тармаклары өчен югары сыйфатлы кадрлар әзерләү бурычлары билгеләнде. Хәзерге вакытта Россиянең кайбер төбәкләрендә кадрлар, бигрәк тә инженерлык һәм эшче белгечлекләре кытлыгы бар.
Фәрит Мөхәммәтшин Россия Федерациясе Закон чыгаручылар советы карары проектына кертү өчен Татарстанның квалификацияле кадрлар әзерләү системасын камилләштерү мәсьәләләре буенча үз тәкъдимнәрен бирергә әзер булуын билгеләп үтте. «Әлеге мәсьәләне федераль дәрәҗәдә төбәк закон чыгаручылары катнашында карау актуаль һәм бик вакытлы, — дип басым ясады республика парламенты башлыгы, — барлык кыенлыкларга да карамастан, Татарстан быел эшсезләр санын минимальләштерде. Моннан тыш, без үзебездә «эшче куллар», эшче квалификация белгечләре җитешмәвен билгеләп үтәбез. Татарстан бу проблеманы хәл итү белән актив шөгыльләнә».
