“Илһам чишмәсе” исемендәге төбәкара конкурсның җиңүчеләре билгеле. Өч этапта узган җыр бәйгесенә шушы көннәрдә Сарман Сәнгать мәктәбендә йомгак ясалды. Илһам Шакиров туган ягыннан Мөршидә Җиһан репортажы.
Ишек төбеннән үк Сарман сәнгать мәктәбенә килүчеләрне Илһам Шакиров үзе каршы алгандай була. Сәнгатькә мәхәббәт уятучы, иҗатка канат куючы әлеге бинага да аның исеме бирелде. Шуңа да Илһам чишмәсе конкурсының икенче өлеше нәкъ менә биредә узуы табигый.
Бәйгенең төп иганәчеләре – Сарман җирлегендә туып-үскән Гамировлар гаиләсе. Алар инде бу бәйгене 2 ел Сарман җирлегендә үткәргән. Ә быелгысын Бөтендөнья татар конгрессы ярдәме белән республикакүләм дәрәҗәдә узды.
Катнашучыларга таләпләр шактый катлаулы булса да берсе дә сынатмады. Дөресен әйтергә кирәк, әлеге конкурста җырны халыкчан башкару осталыгы бәяләнде. Шуңа да Илһам ага Шакиров репертуарындагы җырларны заманча яңгыратырга омтылучыларга жюри әгъзалары талантларын башка конкурсларда сынап карарга кушты. Бу фикер белән Сарманны туган ягы дип санаган драматург Мансур Гыйләҗев тә килешә.
Мәшһүр абыйсы истәлегенә үткәрелгән конкурсны Флюр Шакиров та ел саен түземсезләнеп көтеп ала.
Флер Шакиров “Илһам чишмәсе” конкурсына быел оныгын да алып килгән. Иң кечкенә катнашучыларның берсе Сәйдә Гатинаны әнисе сәхнәгә чыгарга әзерли.
Беренче дәрәҗәдәге лауреат исеменә лаек булырлык җырны Актыныш егете Илмир Зәһретдинов башкара.
Сәйдә Абдуллина, Рөстәм Хөсәенов, Гөлия Зәһретдинова һәм Ильмир Зәһретдинов үз яшь төркемнәрендә беренче дәрәҗәдәге дипломантлар исеменә лаек булды.
Мөршидә Җиһан, Ирек Хәмидуллин. Татарстан яңалыклары өчен Сарман районыннан.
