Бүген 21 нче февраль — Халыкара туган тел көне. Шул уңайдан, Татарстанның Дәүләт Советы Рәисе, Татарстан халыклары Ассамблеясе Советы Рәисе Фәрит Мөхәммәтшин Республика халкын, Халыкара туган тел көне белән котлады.
Хөрмәтле татарстанлылар! Сезне 21 февральдә җир шарының барлык тарафларында да билгеләп үтелә торган Халыкара туган тел көне белән котлыйм. Гасырлар дәвамында күпмилләтле һәм күпконфессияле дәүләт буларак формалашкан Россия өчен туган телләрне саклау һәм үстерү мәсьәләсе гаять зур әһәмияткә ия.
Татарстан – иң алдынгы Россия Федерациясе субъектларының берсе, монда 170тән артык халык вәкилләре яши. 2023 ел республикабызда Милли мәдәниятләр һәм гореф-гадәтләр елы дип игълан ителде. Һичшиксез, аның кысаларындагы чаралар җәмгыятьтә толерантлык идеяләрен ныгытуда, кече һәм олы Ватанга карата мәхәббәт тәрбияләүдә тагын бер адым булачак.
Халыкара туган тел көне төрле телләрдә сөйләшүче кешеләрнең үзара аңлашуын алга таба да ныгытсын, бер-береңне яхшырак белергә, балаларга һәм оныкларга туган телгә мәхәббәтне һәм Ватан өчен горурлыкны тапшырырга ярдәм итсен.Барыгызга да ихлас күңелдән нык сәламәтлек, тынычлык, бәхет һәм иминлек телим- диелә Дәүләт Советы Рәисе Фәрит Мөхәммәтшинның котлавында.
