«Туган авылым» милли-туристлык комплексында Казанның танылган мөселман хатын-кызлары, остазлар, мөгаллимәләр һәм җәмәгать эшлеклеләре очрашуы узды. Анда сүз ни хакында барды, Татартстан мөфтие нинди тәкъдим кертте? Гамьле очрашудан хәбәрчебез Мөршидә Җиһан репортажы.
Очрашуның сәбәбе мөселман хатын-кызларының киеменә багышланса да сүз гомумән татар халкында милли-дини үзенчәлекләрне саклау турында барды.
Февральнең беренче көнен мөселман илләрендә хиджап көне дип искә алу кабул ителгән. Мөфти хәзрәтләре фикеренчә аны татарча яулык көне яки Татар милли киемнәре кичәсе дияргә була. Татарстан Мөслимәләр берлеге җитәкчесе Наилә ханым Җиһаншина әлеге көннең очрашу, аралашу, тәҗрибә уртаклашу өчен бер форсат булачагын искәртте.
Мондый Очрашуларның гадәттә дәвамы –ярминкә яисә остаханә. Бу юлы икесе дә булды. Милли, зәвыклы яулыкларны сатып алучылар , аларны килешле итеп бәйләргә дә өйрәнде. Тышкы кыяфәттә төсләрне туры китерү дә мөһим. Остазлар үз белгәннәре белән бик теләп уртаклашты.
Очрашуда мөхтәрәм кунаклар сыйфатында Татарстан мөфтиенән тыш Россиядә мөселманнарның юридик хокукларын яклау өлкәсендә эш тәҗрибәсе булган танылган адвокат Руслан Нагиев та катнашты. Ул Росия Конституциясендәге киенү рәвеше белән бәйле маддәләргә ачыклык кертте.
Мөршидә Җиһан, Ирек Хәмидуллин. Татарстан яңалыклары.
