Тарихи ядкарләрне кадерләп саклау изге гамәл. Зәй районының Түбән Биш авылында Рабит Батулланың музеен ачарга җыеналар. Музей бүлмәсе мәктәп коллективы откан грант хисабына оешкан.Тулырак алдагы язмада.
Түбән Биш мәктәбендә язучы Рабит Батулланың озак еллар тупланган мирасын кадерләп саклый беләләр. Язучы үзенең мактау кәгазьләрен, тормыш-көнкүреш экспонатларын мәктәпкә бүләк иткән. Февраль аенда язучының үзе катнашында музей ачылырга тиеш.
Бер якта язучының төрле елларда басылган әсәрләр тупланмасы, икенче киштәдә бүләк итеп бирелгән сөлгеләр урнаштырылган. Мәсәлән, Кукмара сөлгесенең бер гасырлык тарихы бар. Батулланың танылган каракүл бүреге дә кадерле урын алган. Музей-кабинет Татарстанда яшәүче халыкларның гореф-гадәтләрен саклау һәм үстерүгә юнәлдерелгән проектта грант оту хисабына оештырыла.
Рабит Батулла иҗатына хөрмәт һәм кызыксынуны укучыларда гына түгел, бакчага йөрүче сабыйларда да тәрбиялиләргә тырышалар. Биредә шулай ук Түбән Биш мәктәбен тәмамлаган Габдулла Тукай исемендәге Дәүләт премиясенә ия шагыйрь Мөдәррис Әгъләмов, театр артисты Наил Дунаев иҗатлары да тирәнтен өйрәнелә.
Ләлә Зәйнуллина, Адилә Борһанова, Александр Тимофеев. Татарстан яңалыклары. Зәй районы.
