Татарстан Республикасы мөселманнары Диния нәзарәтендә журналистларга рус телендә онлайн-мәдрәсә тәкъдир ителде Тулырак хәбәрчебез Мөршидә Җиһан язмасында.
«Иж-Буби», Галия «Мөхәммәдия» һәм башка мәдрәсәләр үз заманы өчен милли югары уку йорты дәрәҗәсендә булган. Ә бер гасырдан соң без мәдрәсәләрнең онлайн форматын да уйлап чыгардык. Туган телләр һәм халыклар бердәмлеге елында Татар телендә онлайн мәдрәсә эшли башласа, Милли мәдәниятләр һәм гореф-гадәтләр елында рус телендәгесе барлыкка килде.
Онлайн мәдрәсә заманча технологияләр белән Ислам нигезләрен берләштергән классик уку-укыту программасы. Халыкта Дин сабакларын читтән торып укытуга ихтыяҗ зур дип аңлатты журналистларга тәкъдир итү чарасында катнашкан Камил хәзрәт Сәмигуллин. Әлеге проект мөфти тәкъдиме белән башланган. Ә аны чынга ашыруда Хозур нәшрияты белгечләре башлап йөри.
Укырга теләүчеләр өчен һәр адым аңлаешлы.Башта мәдрәсә. татар сылтамасы буенча теркәлү узарга кирәк. Ул социаль челтәрләрдәге аккаунтлар аша да мөмкин. Аннан видеолекция, аудиодәрес һәм текст форматындагы материаллардан торган белем бирү контенты ачыла. Мәсәлән Тәфсирне Солтан хәзрәт Морадимов белән Айрат хәзрәт Яруллин алып бара , ә әхлак дәресләрен Рөстәм хәзрәт Хәйруллин аңлата. Онлайн мәдрәсә үзеңә уңайлы вакытта уку сәгатьләрен сайлау мөмкинлеге бирә.
Мөршидә Җиһан, Ирек Хәмидуллин, Татарстан яңалыклары.
