Ике кечкенә трактор, кар чанасы, картинг машинасы: Мамадыш районының Арташ авылы егете Динар Гәрәев буш вакытларында иске детальләрдән яңа төр техникалар ясый. Әйтик, бер трактор өчен күпме чыгымнар тотыла? Хуҗалык эшләрендә аларның ярдәме тияме? Болар турында тулырак Мамадыштагы хәбәрчебез Илнур Юнысов репортажында.
Динар Гәрәевның үзе ясаган беренче мини-тракторы бу. Ул аны моннан 3 ел элек җыеп чыккан. “Ял көннәрем гаражда үтте. Техника якынча ике ай эчендә әзер булды”, — ди сюжет герое. Идеяләрне интернеттан да алган, үзеннән дә өстәгән. Ә детальләрнең күпчелеге иске “Жигули” машинасыныкы.
Динар әлеге кечкенә тракторны ясаганда двигателен генә сатып алган. Техниканы сафка бастыру өчен якынча ун мең сум чыгым тотылган.
Хәзер әлеге трактор хуҗалыкта ел әйләнәсе төп ярдәмче. Динарның әтисе Нургали абый сүзләренчә, ул аның белән әле күрше-тирәгә дә ярдәм итәргә өлгерә: бакчаларын эшкәртә, печән алып кайта.
Динар Гәрәев бүгенге көндә гаиләсе белән Алабуга шәһәрендә яши. Арташ вылына ял көннәрендә генә кайталар. Аның үзе иҗат иткән техникалары дүртәү. Шушындый ук тагын бер тракторын үз хуҗалыгына алып киткән. Ә әлеге кар чанасы белән картинг машинасын уллары өчен ясаган.
