Казан шәһәре Совет районының татар телендә белем бирүче 149нчы лицее — Татарстан Республикасы халыкларының телләрен, мәдәни мирасларын, гореф-гадәтләрен саклау һәм үстерү юнәлешендәге эшчәнлеге өчен грантка ия булган уку йорты. Мәгариф системасына кагылган кырыс үзгәреш җилләренә бирешмичә, үзенең милли йөзен саклап калган әлеге уку йортында Татарстан телерадиокомпаниясенең иҗат төркеме булып, лицей тормышы белән танышып, аралашып кайтты.
Казан шәһәренең Совет районында урнашкан, 30 еллык тарихы булган 149 нчы лицей- 90 нчы еллар башында мәктәп-гимназия рәвешендә ачылып, бүгенге көндә Татар телендә белем бирүче уку йорты сыйфатламасы астында эшләп килүче уку йорты, милли мәгарифкә тугры булып кала, татар халкының бай тарихи мирасын барлау һәм өйрәнүдән туктамый. Билингваль һәм полилингваль белем бирү буенча зур тәҗрибә туплаган һәм республикабыздагы башка мәктәпләргә үрнәк булган әлеге уку йорты коллективы 2006 елда Россия Президентының Бер Миллион сумлык грантына лаек була. Милли мәгариф өлкәсендәге уңышлары өчен Каюм Насыйри бүләгенә лаек булган белем йорты- «Татарстанның иң яхшы мәктәбе» конкурсы призёры, Бөтенроссия бәйгесенең «Уңышлы мәктәп» гранты кысаларында җиңүче мәктәп.
Коллективның төп кыйбласы-төрле яктан үсеш алган шәхес тәрбияләү. Биредә һәр бала үзен төрле өлкәләрдә сынап карар өчен шартлар тудырылган: Балаларда милли үзаң формалаштыруда мәктәп коллективы, нигездә, Айдар Низамовның «Милли тәрбия бирү концепциясе»нә таянып эшли. Анда, халык педагогикасы алымнары белән беррәттән, инновацион технологияләр куллануга да киң урын бирелә. Лицейда меңнән артык бала белем алуга да карамастан, һәр баланың шәхси үзенчәлекләрен, эчке халәтен, кичерешләрен күзаллап, бер генә укучыны да читтә калдырмыйча, күпкырлы эш алып барыла.
Укыту-тәрбия эшен лицейның элекке уңышларына таянып, балаларга ныклы белем һәм тәрбия бирүгә күңел җылысын салган, аларның киләчәгенә битараф булмаган, үз эшләрен яратып башкарган укытучылар, хезмәткәрләр, мәктәпкә ярдәм кулын сузарга әзер торган эшмәкәрләр, әти-әниләр, «мин – татар» дип горурлана торган укучылары булганда, әле бу уку йортының киләчәге өметле, тоткан кыйблалары изге, якты.
