Узган ел Татарстанда «Мәгариф» илкүләм проектын гамәлгә ашыру өчен 2,8 миллиард сум акча юнәлдерелгән. Шул исәптән федераль бюджеттан – 2,3 миллиард, республика казнасыннан 500 миллион сум бүленгән. Бу хакта ТР Мәгариф һәм фән министрлыгының матбугат хезмәте хәбәр итә.
«Төзелеш һәм ремонт эшләренә – 2,4 миллиард, җиһазлар сатып алуга – 383 миллион, «Авыл укытучысы» программасы буенча авыл торак пунктларына эшкә кайткан мөгаллимнәргә бер тапкыр түләү өчен 10 миллион сум бүленгән», — дип белдерделәр министрлыкта.
Моннан тыш, «Мәгариф» илкүләм проекты буенча 117 авыл мәктәбе, шулай ук сәламәтлек мөмкинлекләре чикле балалар белем ала торган ике мәктәпнең матди-техник базасы яңартылган. 46 мәктәпкә һәм алты һөнәри белем бирү оешмасына компьютер җиһазлары сатып алынган.
Татарстанның Апас һәм Баулы районнарындагы авыл мәктәпләрендә ике спорт залын ремонтлау эшләре төгәлләнгән.Россиядә илкүләм проектлар РФ Президенты Владимир Путин күрсәтмәсе белән 2019 елдан гамәлгә ашырыла.
