Яңа ел – могҗизалар вакыты. Ә “Теләкләр чыршысы” акциясе иң якты хыялларны тормышка ашыра.Республикабызның шәһәр районнарында да әлеге акциягә бик теләп кушылдылар. Һәр ел саен үткәрелә торган хәйрия чарасының максаты, авыр хәлдә булган гаиләләргә ярдәм күрсәтү. Әйтик, Буа районында әлеге акция буенча, 20 бала теләгән бүләген алачак. Ә Тылсымчы ролендә район башлыгы Ранис Камәртдинов.
Раил Әхәтовның Яңа ел теләге бүген чынга ашты – Ранис Камәртдинов аңа бәйрәм бүләге тапшырды. Мулланур Вахитов исемендәге гимназиядә белем алучы егет Кыш бабайга хатны бер ай элек үк язган. Тылсымчы кулыннан ул уен приставкасы алу турында хыялланган.
Алших авылыннан Елизавета Журавлевага да Яңа ел бүләген тапшырдылар. Аның хатын район башлыгы республика “Теләкләр чыршысы”ннан алган. 5 яшьлек кызга курчаклар һәм йомшак уенчык бүләк иттеләр.
“Теләкләр чыршысы” акциясе дүртенче ел үткәрелә. Чара сәламәтлек мөмкинлекләре чикләнгән, аз тәэмин ителгән гаилә балаларының һәм ятимнәрнең хыялларын тормышка ашырырга мөмкинлек бирә.
Яңа ел тылсымчылары 12 гаиләдән 20 баланың хыялын тормышка ашырачак.
Алсу Сәмигуллина, Илнур Кадыйров, Татарстан яңалыклары.
