Буада авыл районнарының ир-егетләр командалары арасында волейбол буенча ТР Чемпионатының финал этабы узды. Турнир, традицион рәвештә, “Сәламәтлек” Спартакиадасы кысаларында оештырылды. Анда төрле муниципаль районнардан 8 команда көч сынашты. “Импульс” спорт комплексында барган ярышларны хәбәрчебез дә күзәтте.
Республика авыл районнарының иң көчле волейбол командалары “Импульс” спорт комлексына җыелды. Өч көн дәвамында алар алдынгы урыннарны яулау өчен көч сынашачак. Ярышларда беренчелекне бирмәскә күнеккән буалылар быел да пьедесталның иң югары баскычына менмәкче.
Уеннар ике группада үтте. В төркемендә ярышны Саба һәм Мамадыш командалары уены башлап җибәрде. Соңгылары күптәннән таныш булган көндәшләрнең әзерлеген югары бәяли.
Мамадышлылар реванш алырга теләсә, А төркемендә уйнаучы Азнакай командасы югары урынга лаек булуын исбатламакчы. Спорт өлкәсендә зур җиңүләре булган район республикада пляж волейболына башлангыч бирүче буларак та дан тота.
Турнир 21нче тапкыр оештырылучы “Сәламәтлек” авыл Спартакиадасы кысаларында уза. Финал ярышларына үткәнче командалар ике зона этапларында көч сынашкан.
Уен нәтиҗәләре буенча беренче урынны Саба районы командасы яулады.
Алсу Сәмигуллина, Ильнур Кадыйров. Татарстан яңалыклары
