Казанда җыр авторлары арасында уздырылучы өченче Яңа татар җыры бәйгесенең финалы узды. Барлыгы 95 автор һәм 200 җыр иң яхшылар исемлегенә керергә дәгъва кыла. Бәйгене Рәшид Ваһапов исемендәге татар мәдәнияте иҗтимагый фонды оештыра. Халыклар дуслыгы йортында узган финалда безнең хәбәрчеләребез дә булып кайтты.
Бүгенге көн вәзгыятен чагылдырган “Ил дәшкән чагында” җырының сүзләрен Алсинә Сәләхова, көен Азат Хәлимов иҗат иткән. Патриотик хисләрне чагылдырып, аны Татарстанның халык артисты Рөстәм Асаев башкарды. Быел да конкурс зур кызыксыну уяткан. Оештыру комитеты төгәл 200 җыр кабул иткән. Туган тел, туган җир, ана, бала, балачак, мәхәббәт– конкурска тәкъдим ителгән җыр темалары төрле!
Арада бик күп танылган җырлар авторлары Илгиз Закиров, Дилә Булгакова, Гүзәлия, Айдар Юнусов бар һәм бөтенләй билгеле булмаган авторлар да бар. Композитор, автор башкаручы һәм продюсер Гүзәлия “Яңа татар җыры” бәйгесендә 3нче ел катнаша, 4 җыр җибәргән: берсе балалар өчен, калганнары иң яхшы татар җыры номинациясендә катнаша.
Конкурста яшь буенча һәм географик чикләүләр юк. Иң яшь автор — Мөслимнән 15 яшьлек Ильвир Габдрахманов, иң өлкәне — 92 яшьлек легендабыз Мәсгут Имашев.Балык Бистәсе районыннан Рәсимә Гарифуллина тәрбиягә алынган балалар язмышы турында җыр язган. Авторларның күбесе әле башлап кына иҗат итә. Аларны бергә җыеп, шагыйрь һәм музыка белгечләрен җәлеп итеп, мастер-класс үткәреп булыр иде, дип теләк – тәкъдимнщрен әйтте бәйгенең жюри рәисе Разил Вәлиев! «Өченче Яңа татар җыры» бәйгесенең гала концерты “Пирамида”залында 18 мартта узачак.
Айзилә Батырханова, Иван Худяков.
