Казанда Габдулла Тукай әдәби музеенда Тукайның «Күңелле сәхифәләр» китабы тәкъдим ителде. Бу — Габдулла Тукай үзе исән вакытта нәшер ителгән китапның репринт вариантларын кулланып әзерләнгән яңа форматтагы басма. Тулырак Ләлә Зәйнуллина әзерләгән сюжетта.
Габдулла Тукайның «Күңелле сәхифәләр» китабы беренче тапкыр 1910 елда Казанда «Сабах» нәшрияты, «Милләт» типографиясендә гарәп графикасында нәшер ителә.Яңадан 2022нче елда әлеге басма Татарстан Республикасы Милли музее фондларында, Габдулла Тукай әдәби музее экспозициясендәге нөсхәләренә нигезләнеп, үзенчәлекләрен саклап әзерләнә. Әлеге китап Тукай әдәби музее белән Татарстан китап нәшриятының берничә елга сузылган ныклы хезмәттәшлеге нәтиҗәсе.
Китап өч мең данә тираж белән чыккан.ГабдуллаТукай иҗаты бүгенге көнгә дә аваздаш.Әйтерсең, аның әсәрләре бүген язылган. Шигырьләре балалар исеменнән, аларның күңел халәтен чагылдырып, бүгенге яшьләргә сабак бирә кебек.
Филология фәннәре кандидаты Марсель Ибраһимов Тукайның үз китапларына җитди караганлыгын искәртте. Чарада катнашкан Идел буе районы 10нчы гомуми белем бирү мәктәбе укучылары Тукайның «Күңелле сәхифәләр» китабындагы шигырьләрен сөйләде.
Күпме генә вакыт узса да, Тукайның мәңге искермәс әсәрләре аша милләтебезгә , туган телебезгә мәхәббәт тәрбияләү бүген дә көн үзәгендә кала бирә. Мондый басмаларның милли һәм дини әhәмиятен торган саен ныграк аңлашыла.
Ләлә Зәйнуллина, Дамир Мөхәммәтханов, Татарстан яңалыклары.
