Казанда ЮНЕСКО форумы эшли башлады, ул 8нче декабрьгә кадәр дәвам итә. Быел ЮНЕСКОның Мәдәни һәм табигый мирасны саклау турындагы конвенциясен кабул итүгә ярты гасыр үткән.Форум эшендә Республика Президенты Рөстәм Миңнеханов катнашты. Татарстан башкаласының 50 илне берләштергән зур халыкара вакыйгасы турында киләсе язмада.
Салих Сәйдәшев исемендәге Зур концерт залы- халыкара форумга җиде йөзгә якын кеше җыйды. Казанга төрле илләрдән меңләгән катнашучы килде. ЮНЕСКО объектлары- дөнья сәясәтен ныгыту өчен яңа мөмкинлекләр ача. Бу турыда форум ачылышында Республика Президенты Рөстәм Миңнеханов билгеләп үтте.
Дөньяда конвенциянең 50 ел гамәлдә булу дәверендә 1154 объект ЮНЕСКО исемлегенә кертелгән һәм «аларның статусын күтәрүгә һәм туристлык агымын арттыруга ярдәм итә. Россия мәдәни һәм табигый мирасны яклау, саклау һәм популярлаштыру эшчәнлегендә актив эш алып бара, шул исәптән Татарстан да калышмый. ЮНЕСКО Бөтендөнья мирасы исемлегенә Казан Кремле, Болгар тарихи-археология комплексы, Успенский соборы һәм Зөя утрау-шәһәрчеге монастыре кертелгән.
Хәзер ЮНЕСКОның исемлегенә ике обсерваторияны кертү буенча да зур эш алып барыла. Астрономия обсерваторияләре — бөтенләй яңа номинация, ул дөньяви казаныш, ягъни Татарстанның дөньякүләм мәдәни мирасына керткән өлеше. Россиянең тышкы эшләр министры Сергей Лавровның сәламләү сүзендә, Татарстанның бу юнәлештә эшчәнлеге аерым билгеләп үтелде. Әлеге чарада аны илнең тышкы эшләр министрлыгы вәкиле Сергей Вершинин укыды.
Быелгы форум кысаларында җиде конференция узыр дип көтелә һәм ЮНЕСКО Бөтендөнья мирасы комитетының яшьләр моделе дә тәкъдим ителә. Шулай ук Татарстан күптелле белем бирү учреждениеләрен төзүнең моңарчы күрелмәгән программасын хуплауга да исәп тота. Хәзерге вакытта республикада“Адымнар” күп телле белем бирү комплексларының саны алтыга җитте.
Чулпан Әмири, Инна Данилова, Владимир Юрков, Татарстан яңалыклары.
